Í kjölfar morðsins á Charlie Kirk á miðvikudag hafa háttsettir embættismenn í Hvíta húsinu hótað harðri baráttu gegn því sem þeir kalla „ofbeldisfulla öfga vinstrihreyfingu“ sem búin er að breiðast um allar borgir innan Bandaríkjanna.
Á mánudag kom Stephen Miller, aðstoðarstarfsmannastjóri Hvíta hússins, fram í hlaðvarpi Kirks, en gestastjórnandi þess var varaforseti, Bandaríkjanna, JD Vance, og hét því að „uppræta þessi hryðjuverkanet sem skipulögðu þessa aftöku.“
„Við ætlum að nota alla þá reiði sem þetta verk kveikti til að rífa upp með rótum þessi hryðjuverkasamtök og tryggja öryggi Bandaríkjamanna á ný,“ sagði Miller.
Miller og Vance töldu morðið lið í vaxandi hreyfingu öfgavinstrimanna og sögðu ríkisstjórn Trump nú beita öllu sem í hennar valdi stendur til að bregðast við.
„Við munum virkja allar stofnanir, dómsmálaráðuneytið, Heimavarnarráðuneytið og fleiri til að bera kennsl á, trufla, uppræta og eyða þessum deildum,“ bætti Miller við.
Ótti um kúgun andófs
Ummæli þeirra Miller og Vance hafa vakið ugg meðal andstæðinga Trumps, þar sem margir óttast að þessi orðræða gæti verið notuð til að bæla niður pólitískt andóf og andstöðu við ríkisstjórnina.
Morðið á Kirk, sem var einn áhrifamesti ungi íhaldsmaður landsins og stofnandi Turning Point USA, kemur í kjölfar fjölmargra árása á stjórnmálamenn beggja megin í bandarískum stjórnmálum.
Antifa, stytting á „and-fasismi,“ er regnhlíf yfir lauslega tengda hópa öfga vinstrisinna
Donald Trump forseti lifði af tvær morðtilraunir á síðasta ári og í júní var þingkona frá Minnesota og eiginmaður hennar skotin til bana af grímuklæddum byssumanni.
Í apríl reyndi maður að ráðast á heimili ríkisstjóra Pennsylvaníu, Josh Shapiro.
Trump hefur nú íhugað að setja Antifa á lista yfir hryðjuverkasamtök og mögulega ákæra þá sem safna fé fyrir „óróaseggi“ fyrir skipulagða glæpastarfsemi.
Engin sérstök skrá er til um slík samtök í Bandaríkjunum, en ríkisstjórnin hefur stóraukið svigrúm til að rannsaka innanlands hryðjuverk.
Antifa, stytting á „and-fasismi,“ er regnhlíf yfir lauslega tengda hópa öfga vinstrisinna sem hafa oft verið nefndir í orðræðu um mótmæli sem fara úr böndunum.
Sönnunargögn og handtaka
Fyrr sama dag tilkynnti Kash Patel, forstjóri FBI, að DNA sýni af vettvangi hefði verið tengt Tyler Robinson, sem var handtekinn eftir 33 klukkustunda leit.
Hann verður ákærður formlega á þriðjudag.
Patel sagði Robinson hafa skotið Kirk í hálsinn með einu skoti af þaki byggingar á háskólasvæði í Utah.
Hann greindi einnig frá minnisblaði sem Robinson virðist hafa ritað áður en hann eyddi því.
„Í blaðinu stendur í grundvallaratriðum: ‚Ég hef tækifæri til að fella Charlie Kirk og ég ætla að nýta það,‘“ sagði Patel í viðtali á Fox News.
Robinson er sagður hafa búið með transfólki og haldið sambandi við transfélaga.
Samkvæmt ríkisstjóra Utah, Spencer Cox, hafði hann „öfga vinstrisinnaða afstöðu“ og hafði deilt umdeildum færslum á netinu.
Gagnrýni á viðbrögð FBI
Patel hefur sætt harðri gagnrýni vegna fyrstu viðbragða sinna við morðinu, meðal annars eftir að hann tilkynnti handtöku manns sem síðar var sleppt.
„Gat ég orðað þetta betur í hita leiksins? Jú. En sé ég eftir að hafa sagt það? Nei, alls ekki,“ sagði Patel.
Hann mun mæta fyrir þingnefnd á þriðjudag og svara spurningum þingmanna vegna þessa.
Minningarathöfn og áhrif
Donald Trump forseti mun sækja minningarathöfn um Charlie Kirk í Arizona á sunnudag, þar sem búist er við miklu fjölmenni.
Varaforsetinn JD Vance lýsti Kirk sem „snjallasta pólitíska ráðgjafa sem ég hef kynnst“ og sagði hann hafa átt stóran þátt í bæði eigin kosningu sem og sigri Trump.
Meðal þeirra sem gagnrýnt hafa harðorða viðbrögð Hvíta hússins eru mannréttindasamtök og fræðimenn sem vara við því að samlíking á róttækri pólitískri skoðun og hryðjuverkum geti skapað hættulega undirstöðu fyrir takmörkun borgaralegra réttinda.
„Ef við ætlum að takast á við pólitískt ofbeldi með því að útrýma lýðræðislegu andófi, þá höfum við þegar tapað,“ sagði Nancy Hill, prófessor í stjórnmálafræði við UCLA, í samtali við Washington Post.