Heilbrigðisyfirvöld óska eftir breytingunni
Í kynningu ráðuneytisins kemur fram að tillagan sé lögð fram í kjölfar beiðni heilbrigðisyfirvalda, sem hafi meðal annars bent á að einstaklingar séu almennt heilbrigðari og lifi lengur nú en áður.
Þá er einnig tekið fram að gildandi kröfur leiði til þess að útgefa þurfi mikinn fjölda vottorða ár hvert, sem þýðir að heilbrigðiskerfið sé að eyða verulegum tíma í ferli sem tengist oft fyrst og fremst aldri, en ekki endilega raunverulegu heilsufari.
Færri vottorð – minna álag á lækna
Með breytingunni er markmiðið að draga úr álagi á lækna sem framkvæma læknisskoðanir og veita út vottorð.
Þetta gæti skipt miklu máli fyrir stóran hóp fólks, sérstaklega á aldrinum 65 til 74 ára, sem hefur hingað til oft þurft að standa í endurteknum ferlum vegna ökuskírteinis, jafnvel þótt viðkomandi sé í fullu fjöri og við góða heilsu.
Drögin endurspegla þannig þá nálgun að regluverkið taki meira mið af breyttum aðstæðum í samfélaginu, þar sem fólk er almennt virkara lengur en áður.
Ábyrgðin er alltaf hjá ökumanninum
Þrátt fyrir að draga eigi úr formlegum kröfum er áréttað að meginregla 48. gr. umferðarlaga gildi áfram.
Samkvæmt henni ber ökumönnum að tryggja að þeir séu líkamlega og andlega færir um að stjórna ökutæki í hvert sinn – óháð aldri.