Alvarlegt atvik varð í gær í uppsveitum Árnessýslu þegar karlmaður á sextugsaldri hlaut skotáverka af völdum haglabyssu. Lögreglan á Suðurlandi greinir frá málinu í tilkynningu í dag.
Að sögn lögreglu voru viðbragðsaðilar fljótir á vettvang — lögregla, sjúkraflutningar frá Heilbrigðisstofnun Suðurlands, læknir, vettvangsliðar björgunarsveita og þyrla Landhelgisgæslunnar.
Endurlífgunartilraunir voru gerðar á staðnum en báru ekki árangur. Maðurinn var úrskurðaður látinn á vettvangi.
Rannsóknardeild Lögreglustjórans á Suðurlandi fer með málið og fær aðstoð tæknideildar Lögreglustjórans á höfuðborgarsvæðinu.
Lögreglan segir að ekki verði veittar frekari upplýsingar að svo stöddu.