Atli Sigþórsson, best þekktur sem Kött Grá Pje, er afar ósáttur við að fá ekki úthlutað listamannalaunum þetta árið. Hann segist í samtali við Nútímann hafa verið tjúllaður vegna málsins í gær og viðurkennir að hann sakni þess stundum að vera rappari.
Sjá einnig: Kött Grá Pje er hættur að rappa: „Orðinn gamall karl og nörd — þarf að gera annað“
Hann ætlar þó ekki að gefast upp á því að vera skáld. „Ég var tjúllaður yfir því í gær, tók einn ömurlegan væludag en nú er ég bara farinn að spá í leiðum til að meika monnís,“ segir Atli í samtali við Nútímann.
Atli tjáði sig um málið á Twitter og virtist ekki skemmt
Iss, mig langaði hvort sem er ekkert í þessi ritlaun í alvöru.
— Kött Grá Pje (@KottGraPje) January 5, 2018
Atli grínaðist svo með að byrja aftur að rappa en hann lagði míkrafóninn á hilluna síðasta sumar.
Ætli maður fari þá ekki bara aftur að gera tónlist.
Allavega böns af fríum bjór þar.
— Kött Grá Pje (@KottGraPje) January 5, 2018
Hann viðurkennir að hann sakni þess stundum að vera rappari. „Ég hafði alltaf dálítið skotsilfur upp úr spilaríinu og sakna þess af og til að spila á hæfilega litlum tónleikum og drekka í mig orkuna frá áheyrendum. Það var næs,“ segir Atli.
Hann segir framtíðina vera í óvissu. „Ég veit eiginlega ekkert hvað er framundan. Er fyrir nokkru byrjaður á næstu bók en þarf einhvern veginn að sjá fyrir mér meðfram skriftunum,“ segir Atli.