Lars Lägerbeck segir Sigurð Ragnar Eyjólfsson, fyrrum landsliðsþjálfara kvennalandsliðsins og yfirmann menntunarmála hjá KSÍ, hafa fyrstan viðrað hugmyndina að því að hann yrði þjálfari Íslenska karlalandsliðsins. Þetta kemur fram á Vísi.
Sjá einnig: Geir Þorsteinsson átti hugmyndina að ráðningunni á Lars: „Ég þekkti manninn“
Nútíminn greindi frá því í gær að þrír menn hefðu stigið fram og bent á þátt sinn í ráðningunni á Lars, Sigurður Ragnar Eyjólfsson, Henry Birgir Gunnarsson og Kolbeinn Tumi Daðason.
Geir Þorsteinsson, formaður KSÍ, sagði svo í Akraborginni á X977 í gær að hann hafi átt hugmyndina að því að ráða Lars Lagerbäck sem þjálfara íslenska karlalandsliðsins.
Lars staðfestir á Vísi það sem Sigurður Ragnar hafði að segja um málið.
Mig minnir að hann hafi spurt hvort ég hefði áhuga á þessu verkefni og hvort ég væri tilbúinn í það. Eitthvað í þá veru. Mig minnir að við höfum ekki farið í nein nákvæm smáatriði. Síðan leið einhver tími þar til að Geir hringdi í mig og spurði hvort ég hefði áhuga.
Hann telur blaðaviðtölin ekki með í þessu ferli. „Nei, ég tel fjölmiðlana ekki með, því held að þeir geti ekki boðið manni þjálfarastarf,“ segir hann á Vísi.
Taktu prófið! Hversu vel þekkirðu Lars Lagerbäck?
Sigurður Ragnar, fyrrverandi landsliðsþjálfari kvenna í knattspyrnu og fræðslustjóri Knattspyrnusambands Íslands, sagðist í færslu á Facebook-síðu sinni hafa sannfært stjórnendur KSÍ um að Lars Lagerbäck ætti að taka við þjálfun íslenska karlalandsliðsins fyrir fjórum árum síðan.
Íþróttafréttamaðurinn Henry Birgir benti á dögunum á viðtal sem hann tók við Lagerbäck í september árið 2011 þar sem sá sænski sagðist vera til í viðræður við KSÍ.
Kolbeinn Tumi, fréttastjóri Vísis og fyrrverandi íþróttafréttamaður á Fréttablaðinu, benti á viðtal sem hann tók við Lagerbäck fyrir vefinn Sammarinn.com í janúar árið 2010. Viðtalinu lýkur á því að Lagerbäck er spurður hvort það kæmi til greina að taka við þjálfun íslenska landsliðsins. „Ekki spurning!“ svarar hann.