Lögreglan á höfuðborgarsvæðinu hefur nú til skoðunar hvort hægt sé að hefja rannsókn á nýjan leik á málum kynferðisbrotamannsins Roberts Downeys, á grundvelli minnisbókar Róberts. Bókin innihélt persónuupplýsingar um 335 konur, flestar mjög ungar. Rúv.is greinir frá þessu.
Hulda Elsa Björgvinsdóttir, staðgengill lögreglustjóra, staðfestir í samtali við fréttastofu Rúv að málið sé til skoðunar.
Bergur Þór Ingólfsson og Eva Vala Guðjónsdóttir, foreldrar stúlku sem Robert braut á, skrifuðu grein í Fréttablaðið í dag þar sem þau kalla eftir því að minnisbókin, sem kom nýverið í leitirnar, verði rannsökuð. Þá vilja þau að haft verði samband við þær stúlkur sem eru nefndar í bókinni.