Ísfötuáskoranirnar eru misgóðar en þessi frá fjölmiðlakonunni Ragnhildi Steinunni verður að teljast með þeim betri. Vatnsmagnið var slíkt að mann verður kalt við að horfa á myndbandið.
Ragnhildur Steinunn tók áskorun frá leikkonunni Ágústu Evu og skoraði sjálf á Unnstein Manúel úr Retro Stefson, Eddu Hermannsdóttur blaðakonu og Sverri Þór Sverrisson skemmtikraft.
Ísfötuáskorunin hefur vakið athygli á MND-sjúkdómnum og farið eins og eldur í sinu um heiminn. „Þetta er stórkostleg vitleysa, sem hefur hjálpað MND að eignast sess í hugum manna,“ segir Guðjón Sigurðsson, formaður MND félagsins á Íslandi, í samtali við Vísi og bætir við að allir hafi gott af kælingu.