Nawat Itsaragrisil, eigandi fegurðarsamkeppninnar Miss Grand International, segir að Arna Ýr Jónsdóttir hafi litið út fyrir að vera grennri og fallegri á myndum en hún gerði í raun og veru.
Sjá einnig: Arna Ýr fékk vegabréfið með aðstoð öryggisvarða, eigendurnir vildu fá 344 þúsund krónur
Hann viðurkennir að starfsfólk keppninnar hafi sagt við Örnu Ýri að hún þyrfti að grenna sig til að henni myndi ganga vel í keppninni.
Þetta kemur fram í svari hans við fyrirspurn Vísis.
Þar kemur fram að starfsfólkið hafi ráðlagt Örnu Ýri að grenna sig til að bæta möguleika hennar á að sigra keppnina.
Þá segir hann einnig að Arna Ýr hafi litið út fyrir að vera grennri og fallegri á myndum en hún gerði í raun og veru.
Hann segir að Arna Ýr hafi verið ein af áhugaverðustu keppendunum og hún hafi frábæran persónuleika. Hún hafi komið mjög vel fyrir og starfsfólkið hafi elskað að vinna með henni.
Hann segist hafa fengið áfall þegar hann heyrði af því að hún hefði yfirgefið hótelið. Eitt af skilyrðunum sem sett eru í keppninni er að enginn keppanda má yfirgefa hótelið án leyfis starfsmanna, segir eigandinn í svarinu til Vísis.