Sóknarprestur og formaður sóknarnefndar Hafnarfjarðarkirkju segja særandi og óviðeigandi að Ottó R. Jónsson, kirkjuvörður og staðarhaldari kirkjunnar, hafi tengt þjófnað í kirkjunni við þá sem sækja AA fundi í nágrenninu, líkt og kom fram í Morgunblaðinu í gær.
Sjá einnig: Kirkjuþjónn tengir þátttakendur AA funda við þjófnaði, segir fólk af „ýmsu sauðahúsi“ mæta á fundina
Í fréttinni kom fram að pels, úlpa og veski hefði horfið úr kirkjunni á síðustu mánuðum.
Ottó sagði að „fólk af ýmsu sauðahúsi“ mæti á AA fundina og vildi hann tengja hvarf hlutanna við „óprúttna aðila“ sem eigi erindi á fundina.
Í Morgunblaðinu í dag er birt yfirlýsing sr. Jóns Helga Þórarinssonar, sóknarprests kirkjunnar og Magnúsar Gunnarssonar, formanns sóknarnefndar kirkjunnar.
Þar biðja þeir þátttakendur AA fundanna afsökunar.
„Vegna ummæla kirkjuvarðar Hafnarfjarðarkirkju sem birtust í Morgunblaðinu 12. janúar harma undirritaðir að kirkjuvörðuinn tengi þjófnað í Hafnarfjarðarkirkju við ákveðna aðila, eins og AA fólk sem sækir fundi í Góðtemplarahúsinu, sem er í nágrenni kirkjunnar. Slík ummæli eru særandi og óviðeigandi og biðjum við hluteigandi afsökunar á þeim. Í samræmi við boðskap Jesú Krists styður Hafnarfjarðarkirkja uppbyggilegt starf AA samtakanna enda starfa slíkir hópar m.a. í Hafnarfjarðarkirkju,“ segir í yfirlýsingunni.