Fimm manna fjölskylda brenndist þegar heitt vatn úr goshvernum Strokki skvettist á þau í vikunni. Fjölskyldan hefur birt myndband af atvikinu á Youtube sem má sjá hér fyrir neðan. DV greinir frá málinu.
Atvikið átti sér stað á mánudag og yngstu börnin hlutu 1. og 2. stigs bruna. Fjölskyldan er íslensk en búsett í Noregi og var stödd hér á landi í fríi. Í skilaboðum við myndbandið á Youtube segjast þau afar ánægð með skjót og fagmannleg viðbrögð viðstaddra.
Í myndbandi heyrist í dóttur okkar gráta af sársauka eftir að sjóðandi heitt vatnið skvettist á hana.
Fjölskyldan var innan öryggismarka þegar atvikið átti sér stað. Þau segjast telja að um alvarlegan öryggisgalla sé að ræða sem þurfi að taka alvarlega af rekstraraðilum svæðisins, sem bera ábyrgð á öryggi ferðamanna.
„Þetta var víst ekki í fyrsta skipti sem þetta gerist. Ég vil þakka starfsfólki verslunarinnar Geysis fyrir skjót viðbrögð,“ segja þau á Youtube.
Það er ástæða til að vara viðkvæma við myndbandinu.