Nefnd sem gerði úttekt á umfangi ólöglegs niðurhals leggur til að fjarskiptafyrirtæki láti notendur vita ef þeir eru að brjóta lögin á internetinu með pop-up glugga. Þetta kemur fram í frétt á vef innanríkisráðuneytisins.
Ólöf Nordal innanríkisráðherra kynnti í vikunni áform um að efla tölvubrotadeild lögreglunnar. Nefnd sem var skipuð í vetur gerði úttekt á umfangi ólöglegs niðurhals á netinu á höfundarréttarvörðu efni hér á landi og kannaði hvort íslensk lagaumgjörð veiti slíku efni nægjanlega vernd. Formaður nefndarinnar var Brynjar Níelsson alþingismaður
Nefndin lagði til að stofnuð yrði sérstök netbrotadeild lögreglu þar sem brot gegn rétthöfum höfundarréttarvarins efnis er í forgangi. Þá lagði hún til að skylda fjarskiptafyrirtæki til þess að upplýsa notendur torrent-síða um hugsanleg lögbrot með pop-up glugga.
