Hanna Katrín Friðriksson, þingflokksformaður Viðreisnar, styður ekki áfengisfrumvarpið sem var lagt fram á Alþingi á fimmtudaginn.
Hún greindi frá þessu í ræðustól Alþingis í dag.
Níu þingmenn Sjálfstæðisflokks, Viðreisnar, Bjartrar framtíðar og Pírata standa að frumvarpinu.
Þar er lagt til að einkaleyfi ÁTVR á sölu á áfengi verði afnumið og heimilt verði að selja áfengi í sérrými innan verslana, í sérverslunum eða yfir búðarborð. Einnig er lagt til að heimilt verði að auglýsa áfengi upp að vissu marki.
Sjá einnig: Birgitta vill ekki ræða endalaust um „bús í búðir“, vill þjóðaratkvæðagreiðslu um áfengisfrumvarpið
Birgitta Jónsdóttir, þingmaður Pírata, sagði nýlega að hún vilji að þjóðin greiði atkvæði um frumvarpið.
Í áfengisfrumvarpinu sem var lagt fram á síðasta kjörtímabili var lagt til að sterkt áfengi, 22% eða sterkara, yrði afmarkað frá annarri söluvöru á bak við afgreiðsluborð eða í sérrými innan verslunar. Annað áfengi mátti vera í hillum verslunarinnar.
Ekki er gert ráð fyrir að áfengið verði jafn sýnilegt í nýja framvarpinu. Þar segir aftur á móti að áfengið þurfi að vera í sérstöku rými innan verslunarinnar, eða þá í sérstökum verslunum. Það má sem sagt ekki vera í sömu hillu og morgunkornið.