Þýska fjölskyldufyrirtækið Böcker snýr Louvre-ráninu sér í hag með fyndinni markaðsherferð
Þýska fyrirtækið Böcker Maschinenwerke varð óvænt heimsfrægt eftir að þjófar notuðu eina af húsgagnalyftum þess til að ræna Louvre-safnið í París. Ránið, sem framkvæmt var á innan við tíu mínútum, snerist um Napóleons skartgripi metna á 88 milljónir evra – rúmlega 13,5 milljarða króna.
Daginn eftir ráninu brugðust stjórnendur Böcker við – ekki með afsökunarbeiðni, heldur með nýrri auglýsingu á samfélagsmiðlum:
„Þegar hlutirnir þurfa að ganga hratt fyrir sig.“
„Við sáum fréttirnar og hugsuðum – ó nei, þetta er okkar lyfta!“
Markaðsstjórinn Julia Scharwatz segir að hún og eiginmaður hennar, Alexander Böcker, sem stýrir fjölskyldufyrirtækinu, hafi verið í algjöru sjokki þegar þau sáu myndirnar frá ráninu.
„Við urðum miður okkar fyrst – þetta var glæpur, og tækið okkar hafði verið misnotað. En þegar ljóst var að enginn slasaðist, fórum við að gera grín að þessu og hugsa upp fyndin slagorð,“ sagði hún við The Guardian.
Auglýsingin, sem birtist á Facebook og Instagram, sýnir lyftuna Agilo með léttkærum texta sem lofar 42 metra hraða á mínútu – „eins hljóðlátt og hvíslið“.
Lyftan var stolin í „prufukeyrslu“
Fyrirtækið hafði selt þessa tilteknu lyftu árið 2020 til fransks fyrirtækis sem leigir út flutningatæki af ýmsum stærðum og gerðum. Þjófarnir höfðu sýnt henni áhuga, fengið að prófa hana – og einfaldlega stolið henni í ferlinu.
Franska fyrirtækið hafði þegar tilkynnt þjófnaðinn til lögreglu nokkrum dögum fyrir ránið, en þá var það of seint – lyftan varð aðalverkfærið í stærsta listaverkaráni ársins og mögulega áratugarins.
Netið sprakk – og viðbrögðin skiptust í tvo hópa
Eftir að Böcker birti auglýsinguna fór hún eins og eldur í sinu um samfélagsmiðla.
„Ég hélt að hún myndi verða aðeins smá viral, en nú höfum við náð til 1,7 milljóna manna. Þetta er algjört brjálæði,“ sagði Scharwatz.
Viðbrögðin hafa þó ekki verið öll jákvæð. Margir dáðu húmorinn og kölluðu markaðsdeildina „snillinga“ – en aðrir sögðu auglýsinguna vera „smekklausa“ og óviðeigandi á meðan Frakkar syrgja stolin listaverk.
„My way to the top“
Böcker, sem var stofnað árið 1958 í þýsku borginni Werne, hefur alltaf státað af slagorðinu „My way to the top“. En fáir hefðu getað giskað á að það yrði svona bókstaflegt.
Fyrirtækið segist nú þegar hafa fengið nokkrar nýjar fyrirspurnir um lyftur – þó ekki sé vitað hvort þær komi frá auglýsingunni um safnaránið.