Yfir 40.000 Norðmenn fengu tilkynningu í síma sinn um vinning í Euro Jackpot – og 16.000 þeirra fengu afar ánægjuleg skilaboð um háar fjárhæðir. Það var þó aðeins eitt vandamál: Upphæðirnar voru rangar. Mjög rangar.
Samkvæmt umfjöllun RÚV, byggð á heimildum frá NRK, gerðust mistökin við útreikninga í kerfi Norsk Tipping – norska ríkislottósins. Þar gleymdist að deila tölunum með 100 við umreikning úr evrusentum í norskar krónur. Í stað þess voru upphæðir margfaldaðar með 100 – og þátttakendur fengu SMS um vinning sem var tífalt hærri en hann raunverulega var.
„Við skiljum að margir hafi glaðst. Þetta voru háar tölur,“ sagði fulltrúi fyrirtækisins. En gleðin stóð stutt. Mistökin voru leiðrétt áður en greitt var út.
Bað opinberlega afsökunar
Stjórnandi Norsk Tipping, Tonje Sagstuen, bað opinberlega afsökunar í viðtali við NRK og tilkynnti síðar um afsögn sína eftir stjórnarfund sem haldinn var í kjölfar atviksins. Í yfirlýsingu Sagstuen sagði hún að það væri sárt að hverfa frá starfi, en að það væri rétt skref til að endurheimta traust almennings á starfsemi fyrirtækisins.
Þrátt fyrir að fjárhagslegt tjón hafi ekki orðið, vakti málið mikla athygli í Noregi – bæði vegna mannlegra mistaka og þess trausts sem byggist upp í kringum lottóstarfsemi ríkisins.
RÚV greinir frá því að upphafleg skilaboð hafi borist til 16.000 þátttakenda sem voru með kveikt á tilkynningum í appi lottósins, og mörg dæmi eru um fólk sem þegar var byrjað að skipuleggja hvernig nýr „vinningur“ yrði nýttur – þar á meðal draumaferðir, nýtt húsnæði og bílakaup.
Stundum er betra að bíða þar til peningar eru komnir inn á reikning – áður en maður pælir í hvað maður ætlar að gera við þá.