Rithöfundurinn og fjölmiðlakonan Tobba Marinós mun hefja störf hjá Árvakri, eiganda mbl.is og Morgunblaðsins, innan tíðar. Þar mun hún sjá um að byggja upp matarvef mbl.is.
Tobba staðfestir þetta í samtali við Nútímann.
Hún segist vera ótrúlega spennt fyrir verkefninu og þetta henti henni vel, þar sem hún ver að jafnaði fjórum til fimm klukkustundum í eldhúsinu á dag. Um fullt starf er að ræða og stefnir Tobba að því að hafa umfjöllunina sem fjölbreyttasta. „Áfram allskonar,“ segir hún og bætir við að verkefnið skýrist á næstu vikum en fyrsti vinnudagurinn hennar er í dag.