Lögregluyfirvöld í Minnesota eru nú með víðtæka leit að vopnuðum árásarmanni sem grunaður er um að hafa myrt áhrifamikla þingkonu og eiginmann hennar, ásamt því að skjóta annan þingmann og eiginkonu hans. Alríkislögreglan FBI telur árásirnar pólitískt drifnar og hefur boðið 50.000 dollara í verðlaun fyrir upplýsingar sem leiða til handtöku mannsins.
Sá grunaði, Vance Boelter, 57 ára, var áður embættismaður hjá ríkisstjórn Minnesota og hefur lengi starfað innan öryggisgeirans. Hann er sagður hafa verið klæddur í búnað líkan lögreglunni þegar hann hóf skothríð á tvö heimili í úthverfum Minneapolis aðfaranótt laugardagsins 14. júní.
Fyrrverandi þingforseti og eiginmaður hennar myrt á heimili sínu
Fyrst barst neyðarkall frá heimili öldungadeildarþingmannsins John Hoffmans í Brooklyn Park um klukkan tvö um nóttina. Bæði Hoffman og eiginkona hans Yvette voru skotin og eru alvarlega slösuð, en von er um bata. Tæpum 90 mínútum síðar fundust þingkonan Melissa Hortman og eiginmaður hennar Mark látin á heimili sínu í Champlin, um átta kílómetra frá fyrra vettvangi.
Hortman hafði verið áberandi í stjórnmálum Minnesota í rúm 20 ár, gegnt embætti forseta fulltrúadeildarinnar og verið leiðtogi Demókrata á ríkisþinginu. Eiginmaður hennar Mark starfaði sem lögfræðingur í samfélaginu.
Lögregla kom að Boelter við heimili Hortman, þar sem skotbardagi átti sér stað áður en hann flúði á hlaupum út í nóttina.
Eiginkona grunaðs stöðvuð með vopn og vegabréf
Síðar um daginn var eiginkona Vance, Jenny Boelter, stöðvuð af lögreglu við bensínstöð um 120 kílómetrum frá vettvangi. Með henni í bílnum voru þrír ættingjar. Lögregla fann í bílnum skotvopn, skotfæri, mikið reiðufé og vegabréf. Hún var yfirheyrð en ekki handtekin.
Í bílnum fundust einnig mótmælabæklingar merktir slagorðinu „No Kings“, sem hefur verið notað í and-Trump mótmælum. Vance Boelter var þekktur stuðningsmaður Trump og samkvæmt heimildum hafði hann áður lýst yfir andstöðu sinni við þungunarrof.
Boelter hafði einnig unnið sem öryggisráðgjafi erlendis og tekið þátt í trúboði. Á samfélagsmiðlum lýsti hann kristinni trú og nefndi börn sín eftir dyggðum eins og Hope, Faith og Grace.
Boelter er enn á flótta og talinn vopnaður og hættulegur. Alríkisyfirvöld biðla nú til almennings um aðstoð við að hafa hendur í hári hans.
