Notendur Twitter ráku upp stór augu í dag þegar samfélagsmiðillinn breytti „favorite“-stjörnunni í hjartalaga like-takka. Breytingarnar eiga að gera Twitter auðveldari í notkun og meira gefandi, samkvæmt bloggfærslu á vef samfélagsmiðilsins.
„Við vitum að stjarnan gat stundum verið ruglandi, sérstaklega fyrir nýtt fólk á Twitter. Manni líkar við ýmislegt en það er ekki allt í uppáhaldi,“ segir í færslunni.
Myndbandið hér fyrir neðan útskýrir breytinguna á myndrænan hátt.
You can say a lot with a heart. Introducing a new way to show how you feel on Twitter: https://t.co/WKBEmORXNW pic.twitter.com/G4ZGe0rDTP
— Twitter (@Twitter) November 3, 2015
Í bloggfærslunni kemur fram að notendur Vine fái einnig hjartað.
„Hjartað er alþjóðlegt tákn þvert á tungumál, menningarheima og tímabelti. Hjartað gerir okkur kleift að tjá tilfinningar okkar á auðveldan hátt og tengjast fólki. Samkvæmt prófunum okkar var fólk að elska hjartað.“