Una gaf út lagið Ekkert að fyrir helgi og von er á fyrstu plötu hennar í vor.
Fyrir tæplega tveimur árum gekk Una í gegnum erfið veikindi. Þá var móðir hennar, Svandís Svavarsdóttir, heilbrigðisráðherra og gekk þá í garð afar erfitt tímabil hjá fjölskyldunni.
Veikindin uppgötvuðust eftir að Una fékk skyndilegt flogakast og kom þá í ljós að hún væri með illkynja heilaæxl í heila. Aðeins 19 ára gömul byrjaði hún því í erfiðri krabbameinsmeðferð. „Þetta ferli gekk alveg ótrúlega vel, ég var rosalega lánsöm. Það að veikjast neyddi mig til að setja lífið mitt í pásu og vinna í andlegu hliðinni. Það er eiginlega það eina sem maður hefur einhverja stjórn á þegar maður lendir í svona.“
Una hefur glímt við þunglyndi og ýmsa vanlíðan síðan hún var unglingur og segir hún að veikindin hafi ýtt henni út í að kljást við þessi vandamál. „Ég fékk svo mikla hjálp,“ segir hún. „Það að ég sé að gefa út tónlist núna er að miklu leyti afleiðing þess að ég hafi farið í markvissa sjálfsvinnu og unnið í fullkomnunaráráttu og höfnunarótta.“