Hótel hjólar í áhrifavald sem vildi fría gistingu: „Jesús kristur! Aldrei myndi ég biðja neinn um neitt frítt“

Paul Stenson, framkvæmdastjóri Charleville Lodge hótelsins í Dublin, hjólaði opinberlega í áhrifavaldinn Elle Darby, sem sendi honum póst og óskaði eftir ókeypis gistingu í skiptum fyrir kynningu á Youtube-rás sinni. Paul notaði Facebook-síðu kaffihússins The White Moose Café til að birta skilaboð til Elle ásamt skjáskoti af pósti hennar til sín.

Í pósti sínum sagðist Elle vera með rúmlega 87 þúsund áskrifendur á Youtube ásamt 76 þúsund fylgjendum á Instagram. Hún sagðist vera á leiðinni til Dublin ásamt kærastanum sínum og óskaði eftir því að fá að gista frítt gegn því að kynna hótelið og starfsemi þess á samfélagsmiðlum sínum.

Paul var ekki hrifinn af póstinum frá Elle og sagði í færslu sinni á Facebook að það þyrfti mikinn kjark til að senda svona póst. „Ef ég leyfi þér að gista gegn því að birtast í myndbandinu þínu, hver á greiða starfsfólkinu sem sér um þig? Hver greiðir fólkinu sem þrífur herbergið? Þjónunum sem færa þér morgunverð? Fólkinu í möttökunni? Hver borgar fyrir hita og rafmagn á meðan þú gistir? Vatn? Kannski ætti ég að segja starfsfólki mínu að í stað þess að fá greitt muni þau birtast í myndbandinu þínu?“

Hann sagðist svo vera með samtals 186 þúsund fylgjendur á Facebook, 80 þúsund á Snapchat, 32 þúsund á Instagram og 12 þúsund á Twitter. „En Jesús kristur! Aldrei myndi ég biðja neinn um neitt frítt,“ bætti hann við. Paul hvatti hana svo til að borga fyrir gistinguna sína í framtíðinni og sagði hótel sem sjá hag sinn í að birtast í myndböndunum hennar geta uppfært herbergi hennar upp í svítur.

Elle birti í kjölfarið myndband þar sem hún segir framkvæmdastjórann hafa grillað sig og að hún skammist sín. „En ég vildi vel,“ sagði hún

Paul Stenson hefur í kjölfarið verið harðlega gagnrýndur fyrir afstöðu sína. Hefur honum verið bent á að hann geti litið á það sem markaðskostnað að leyfa áhrifavöldum að gista frítt og að það geti skilað sér í auknum viðskiptum.

Hann er þó ekki af baki dottinn og birti kaldhæðna afsökunarbeiðni þar sem hann þakkaði meðal annars fyrir kynninguna, sem fólst í því að fólk á internetinu sé að tala um hótelið hans.

Hér má sjá færsluna þar sem Paul hjólar í Elle

Og hér má sjá kaldhæðnu afsökunarbeiðnina