Stökkir, klístraðir og ómótstæðilega góðir kjúklingabitar.
Hráefni:
1/2 kíló kjúklingabringur skornar í 2 cm bita.
2 hvítlauksgeirar, rifnir niður
smá bútur af engifer, rifinn niður
1 vorlaukur, skorinn smátt
3 dl kornflakes, vel kramið eða mulið
2 msk hunang
1 dl sojasósa
1 msk sesamolía
1 msk hrísgrjónaedik
2 msk hveiti
2 msk sesamfræ
svartur pipar
ólívuolía
1/2 msk chilli paste eða sambal olek ( fæst í öllum matvöruverslunum)
2 dl butter milk ( eða 2 dl mjólk + 1 msk sítrónusafi blandað saman )
Aðferð:
1. Setjið kjúklingabitana í poka og hellið buttermilk ofan í, lokið pokanum vel og hristið pokann svo kjúklingurinn verði vel marineraður í mjólkinni.
2. Hitið ofninn í 210 gráður og setjið bökunarpappír á ofnplötu.
3. Setjið kornflakes, hveiti og pipar í meðalstóra skál og blandið vel saman.
4. Takið síðan einn bita í einu úr pokanum og færið yfir í kornflakes-blönduna og hjúpið bitann vel. Færið síðan yfir á ofnplötuna. Þegar allir bitarnir eru komnir á plötuna þá eru bitarnir penslaðir létt með ólívuolíu og fara síðan inn í ofninn í um 15-20 mínútur.
5. Á meðan kjúklingurinn er í ofninum er kóreska BBQ sósan útbúin. Í litlum potti er hituð sojasósa, hunang, chilli paste, hrísgrjónaedik, engifer, hvítlaukur, sesamolía og 1/2 dl vatn. Hitið að suðu og látið malla í um 5-10 mínútur eða þar til sósan hefur þykknað aðeins. Færið sósuna síðan af hitanum.
6. Þegar kjúklingurinn er kominn úr ofninum er sósunni penslað rausnarlega á alla bitana, allan hringinn. Stráið síðan sesamfræjum og söxuðum vorlauk yfir. Berið fram heitt. Njótið!