Þeir félagar Bjarni Siguróli Jakobsson, Fannar Vernharðsson og Jóhannes Steinn Jóhannesson tóku sig til síðastliðið sumar og opnuðu saman veisluþjónustuna Nomy. Þeir eru allir miklir reynsluboltar í eldhúsinu og má með sanni segja að hér sé samankomin ein öflugasta kokkasveit landsins enda hafa þeir komið víða við á sínum ferli.
Þeir hafa til dæmis verið meðlimir, þjálfarar og fyrirliðar Kokkalandsliðsins, keppt í innlendum og alþjóðlegum matreiðslukeppnum með eftirtektarverðum árangri, verið umsjónarmenn matreiðsluþáttanna Grillsumarsins Mikla á Stöð 2, farið víða sem gestakokkar á erlendri grundu til að kynna íslenskt hráefni, verið umsjónarmenn námskeiða fyrir atvinnumenn í veitingabransanum, tekið þátt í vöruþróun í matvælaiðnaði, þjálfað starfsfólk og veitt almenna ráðgjöf.
Nomy er alhliða veisluþjónusta sem tekur að sér allar gerðir viðburða svo sem árshátíðir, brúðkaup, hvataferðir, fyrirtækjapartý, afmæli, útskriftir, fermingar, matarboð og ferðaþjónustupakka úti í náttúrunni svo eitthvað sé nefnt. Þeir sérsníða matseðla fyrir hvert og eitt tilefni og útvega þjóna og kokteilhristara ef óskað er eftir því.
Nú fyrir jólin bjóða þeir upp á svokallaða jólapakka en þú getur sótt pakkann til þeirra eða fengið sent frítt heim á aðfangadag milli kl. 16 & 18 þangað til jólin hringja inn og verið laus við stressið í eldhúsinu. Einnig eru þeir með úrval jóla-smárétta fyrir jólaboðið. Kíktu á nomy.is og sjáðu hvað er í boði hjá strákunum.