Það er liðin meðganga síðan ég skrifaði ykkur síðast. 9 mánuðir.
Við erum enn þá að greiða 1.500 krónur í áskriftargjald af tónlistarveitunni okkar, sem við notum flest rosalega mikið. Sjálfur er ég örugglega bara að borga um 15 krónur á klukkustund fyrir notkunina.
Í fyrra skrifaði ég ykkur bréf um að við mættum ekki venjast þessu, að greiða 1.500 krónur á mánuði fyrir að streyma eins mikið af músík og okkur hentar.
Sjá einnig: Kæri tónlistarunnandi
Nú er ég að vinna með allnokkrum hljómsveitum sem útgefandi og dreifingaraðili hér á landi og ég er mjög stoltur að því fá að kalla mig dreifingaraðila vinsælustu hljómsveitar landsins, Úlfur Úlfur.
Í dag eru liðnir tveir mánuðir síðan platan þeirra, Tvær plánetur, var gerð aðgengileg á tónlistarveitum á borð við Spotify. Það var nú nánast á útgáfudegi, eða viku eftir útgáfudag geisladisksins.
Á þessum tíma hefur lögum sveitarinnar verið streymt 473 þúsund sinnum á tónlistarveitum!
Þetta er íslenskt rapp, með íslenskum textum, þannig að þið áttið ykkur á því að þessi hlustun á sér nánast öll stað hér á landi. Þetta er algjört met — ég hef ekki séð svona mikla hlustun á svo stuttum tíma hér á landi áður. Á plötunni eru 14 lög, þannig að þessi streymi samsvara því að hlustað hafi verið á plötuna alls 33.786 sinnum.
Á ég að segja ykkur hvað Úlfur Úlfur fær í tekjur fyrir þessi 473 þúsund streymi?
Það verða að öllum líkindum rétt rúmar 400 þúsund krónur. Þetta er áætlun enda enginn kominn með uppgjörið í hendurnar. En kommon — 400 fokking þúsund!
Þetta samsvarar rétt rúmlega 200 seldum eintökum af geisladiski, eins og hver og einn sem ætti diskinn myndi hlusta á hann 150 sinnum — yeah right!
Enn og aftur, ég er ekki að reyna að blása lífi í geisladiskinn með þessum skrifum. Ég er bara að reyna að láta ykkur skilja hvað þetta er fáránlegt; að borga 1.500 krónur fyrir svona þjónustu. Geðveika þjónustu! Nánast öll músíkin, líka glæný músík! Í tölvunni! Í símanum! Á spjaldtölvunni! Heima! Uppi á Esju! Hvar sem er!
Spotify tapaði notabene tæplega 24 milljörðum á síðasta ári.
Ég hló upphátt þegar ég skrifaði þetta, án gríns. LOL.
Allavega, hugsið þetta.