Íslenskur karlmaður glímir við skilti

Spjátrungslegur íslenskur karlmaður, á besta aldri, lenti í áflogum við skilti í Alþingishúsinu í gær (sjá mynd hér fyrir ofan). Árni Páll Árnason, formaður Samfylkingarinnar, lýsir atburðinum með þessum orðum: „Hann kom aftan að skiltinu og ætlaði að kasta því út – en skiltið brást þá ókvæða við og reyndi að kuta manninn með löngu járnröri. Ég veit til þess að þessi maður hefur iðkað brasílískt jiu-jitsu í bland við Wing Chun í mörg ár; hann gat því varist stunguna og yfirbugaði skiltið með mestu spekt.“ Þrátt fyrir þessa illmannlegu áras skiltisins, kemur samlokustaðurinn Joe & the Juice til með að opna í Alþingishúsinu eftir helgi. Forseti Alþingis, Einar K. Guðfinnsson, ætlar að ræða við skiltið um helgina og segir að um sé að ræða einstæðan atburð: „Þingmenn þurfa ekki að hafa neinar áhyggjur.“ Ekki náðist í forsætisráðherra fyrir fréttina, en samkvæmt upplýsingum frá almannatengli, varð Sigmundur fyrir miklum vonbrigðum með opnun staðarins – „Hann hefði viljað fá Sóma samlokur þarna inn.“