Facebook hópurinn Báráttuhópur gegn Ofbeldismenningu logaði glatt á páskasunnudag þegar ein kona birti þar málshátt sem hún hafði fengið en hann hljómaði svo: „Tvennt er kyn af manni hverjum.“
Svo virðist sem þessi málsháttur hafi farið rangt ofan í margar en allir stjórnendur síðunnar fordæmdu málsháttinn og töldu hann merki um úreltan hugsunarhátt og óviðeigandi í nútíma samfélagi.
Sóley Tómasdóttir, fjölbreytileikafræðingur, setti einnig inn sitt álit á málshættinum, en það var stutt og einfalt ‚oj‘.
Fjölmargir fleiri fylgdu á eftir en Bjarki nokkur setur inn merkingu málsháttarins, sem hann segir vera þá að verið sé að vísa í að baki öllum séu tvær ættir. Önnur merking sem bent er á, er sögð vera að hægt sé að vera með fleiri en eina skapgerð. Eftir það segir ein í ummælum að ekki eigi að vera með málshætti í umferð um jafn viðkvæm málefni sem geti misskilist svo auðveldlega.
Uppfærsla: Færslunni hefur verið eytt síðan fréttin var skrifuð.
