Bjarnheiður Hallsdóttir, framkvæmdastjóri ferðaskrifstofunnar Katla DMI og fyrrverandi formaður Samtaka ferðaþjónustunnar, skrifar um undirbúning fyrirhugaðrar þjóðaratkvæðagreiðslu um inngöngu í Evrópusambandið í færslu á Facebook.
Hún segist áður ekki hafa haft fasta afstöðu til aðildar Íslands að Evrópusambandinu en að hún hafi mótað sér skoðun eftir að hafa fylgst náið með umræðunni undanfarið.
Segir undirbúning ófullnægjandi
Bjarnheiður telur að ríkisstjórnin hafi farið af stað með þjóðaratkvæðagreiðslu í flýti og án nægilegs undirbúnings. Hún segir skorta skýr svör við því hvað taki við eftir atkvæðagreiðsluna og að almenningur sé ekki að fá nægar upplýsingar til að geta myndað sér upplýsta afstöðu.
Að hennar mati hafi lítið komið frá stjórnvöldum sem hjálpi til við að skýra málið. Hún gagnrýnir jafnframt að skilaboð frá ríkisstjórninni séu óljós og að stjórnarflokkarnir virðist ekki samstíga í málinu. Þá nefnir hún sérstaklega að forsætisráðherra hafi haldið sig mikið til hlés í umræðunni.
Gagnrýnir málflutning Evrópusambandssinna
Í færslunni gagnrýnir Bjarnheiður einnig þá sem tala fyrir aðild Íslands að Evrópusambandinu. Hún segir að í mörgum tilvikum sé um að ræða einskonar hálfsannleik og popúlískar fullyrðingar sem geti villt fyrir almenningi.
Hún nefnir meðal annars umræðu um námslán og verðmun á vörum, þar sem hún telur samanburð oft settan fram á villandi hátt. Þá gagnrýnir hún sérstaklega að tengja aðild að Evrópusambandinu við lausnir á verðbólgu og háum vöxtum og gefa í skyn að slík vandamál muni hverfa sjálfkrafa.
Telur andstæðinga hafa yfirhöndina
Bjarnheiður segir að þeir sem eru andvígir aðild Íslands að Evrópusambandinu hafi haft betur í umræðunni hingað til. Að hennar mati byggi málflutningur þeirra frekar á gögnum og þekkingu en upphrópunum, þó hún viðurkenni að dæmi séu um annað.
Kallar eftir innlendum aðgerðum
Að lokum bendir hún á að aðild að Evrópusambandinu og upptaka evru myndi krefjast umfangsmikilla breytinga innanlands, meðal annars í ríkisfjármálum og á vinnumarkaði. Slíkt ferli taki langan tíma.
Hún telur að Ísland geti hins vegar með öflugri stjórnun gripið strax til aðgerða til að takast á við verðbólgu og vexti án þess að ganga í sambandið og spyr hvort raunverulegar, vel rökstuddar ástæður fyrir aðild hafi verið settar fram í umræðunni.