Leikarinn Josh Radnor sem er þekktastur fyrir að leika Ted Mosby í sjónvarpsþáttunum How I Met Your Mother hefur fengið á sig nálgunarbann eftir nágrannaerjur.
Nágrannar Radnor segja að hann geri þeim lífið óbærilegt og eftir að hann lét byggja útipall sem náði yfir á lóð nágranna hans lögsóttu þau hann. Radnor hafði ekki leyfi fyrir framkvæmdunum og var dæmdur til þess að fjarlægja pallinn.
Radnor hefur greinilega ekki verið nægilega sáttur með niðurstöðu dómsins en fjölskyldan sem býr við hliðina á honum segir í samtali við TMZ að hann og herbergisfélagi hans kalli á eftir þeim í hvert sinn sem þau fari úr húsi. Hann taki myndir af þeim og sé ógnandi. Þá fer einnig í taugarnar á þeim að hann sé alltaf ber að ofan í garðinum sínum.
Nú hafa þau fengið í gegn nálgunarbann á Radnor sem verður nú að halda sig í sex metra fjarlægð frá þeim og má ekki sýna þeim ógnandi tilburði.