Halldóra Snorradóttir er ein þeirra sem rætt verður við í lokaþættinum af Sítengd – veröld samfélagsmiðla á RÚV í kvöld. Halldóra segist vera háð samfélagsmiðlum og segir fíknina ekki frábrugðna annarri fíkn.
Halldóra segist einungis hafa sofið í fimm tíma síðustu þrjá daga, símanotkunin er því farin að trufla svefnvenjur hennar líkt og aðra hluti í lífinu.
Sjá einnig: Sjónvarpsþátturinn Sítengd fékk Dóra DNA til að yfirgefa Instagram: „Fastur í vefnum. Hjálp“
„Það er bara eins og með annað – bara vímuefni eða mat, matarfíklar – þetta verður alltaf að vera þarna. Maður þarf alltaf að vera grípa í eitthvað,“ segir Halldóra en hún eyðir allt að níu klukkustundum á samfélagsmiðlum á dag.
Hún segir að samfélagsmiðlaforritin séu hönnuð til þess að gera fólk háð. Fólk eyði tíma sínum þar og það má ekki missa af neinu. Halldóra segir að hún verði alltaf að hafa síman hjá sér, annars hellist yfir hana kvíði.
Nánar verður rætt við Halldóru í lokaþættinum af Sítengd – veröld samfélagsmiðla í kvöld kl. 20.35 á RÚV. Hægt er að sjá brot úr þættinum á vef RÚV með því að smella hér.