today-is-a-good-day

Ragga nagli svarar Rósu Ingólfs: „Hnébeygjurekkar gubba útúr sér hnarreistum og stoltum valkyrjum“

Einkaþjálfarinn og heilsusálfræðingurinn Ragga nagli segir í færslu á Facebook að líkamsskömm sé samfélagsmein á hröðu undanhaldi. „Þó enn liggi nokkrar jarmandi eftirlegukindur í vegarkantinum,“ segir hún.

Ragga leggur út frá pistli Rósu Ingólfs sem Nútíminn fjallaði um í morgun. Þar segir hún meðal annars óskiljanlegt að konur í dag vilji lyfta lóðum sem nema á annað hundrað kílóum „og bæta á sig umfram þyngd sem þær hafa svo ekkert að gera við.“

Sjá einnig: Þrjár furðulegustu fullyrðingarnar í pistli Rósu Ingólfs um konur og lyftingar

Í færslu sinni minnir Rósu á árið sé 2016. „Kraftakeppnir, úthaldskeppnir, ólympískar lyftingar eru stútfullir af hraustum konum. Ræktarsalir, crossfitbox og hnébeygjurekkar gubba útúr sér hnarreistum og stoltum valkyrjum,“ segir hún.

Mörg herrans ár eru síðan forpokaðir ístrukarlar með krepptar tær í lakkskóm kölluðu konur sem lyfta lóðum tudda og ókvenlegar. Þekking á styrktarþjálfun kvenna er komin það langt að vöðvar á legg gera konu ekki karlmannlega í útliti.

Ragga segir að konur velji sér þá hreyfingu og að líkamsvöxturinn fylgi því áreiti sem á hann er lagt. „Nærsveitungar hrósa útliti og samgleðjast árangri. Löngu liðin er sú tíð að kona skeytti því þanka hvort karlmanni þyki hún ókvenleg ef sést glitta í kjöt á upphandlegg,“ segir Ragga.

„Líkamsskömm er samfélagsmein sem er á hröðu undanhaldi sem betur fer. Þó enn liggi nokkrar jarmandi eftirlegukindur í vegarkantinum. Þær hljóta þó að þagna með tímanum.“

Sjáðu færslu Röggu hér fyrir neðan.

Auglýsing

læk

Instagram