Umhverfis- og skipulagsráð samþykkti í dag umsögn þess efnis að Knattspyrnusamband Íslands, í samstarfi við Símann, Landsbankann, Icelandair, N1, Vífilfell, Borgun og Íslenskar Getraunir fái afnot af Ingólfstorgi í sumar til sýningar á leikjum í úrslitakeppni EM karlalandsliða 2016 í knattspyrnu. Þetta kemur fram á vef borgarinnar.
Sjá einnig: Síminn og Nova berjast um Ingólfstorg, vilja fá að sýna leikina á EM í fótbolta í sumar
Eins og Nútíminn greindi frá á dögunum þá tókust Síminn og Nova á um að fá að vera með aðstöðu á Ingólfstorgi í sumar til að sýna frá Evrópumótinu í fótbolta. Þá vildu fyrirtækin standa fyrir öðrum viðburðum í tengslum við keppnina.
Um er að ræða einstakan viðburð í íslenskri íþróttasögu sem fær nú að njóta sín í hjarta höfuðborgarinnar. Ætlunin er að endurskapa stemninguna á knattspyrnuleikvöngunum í Frakklandi á Ingólfstorgi og færa líf í miðborgina.
Samkvæmt samningnum mun KSÍ ásamt samstarfsaðilum standa fyrir útsendingum á risaskjá á Ingólfstorgi þar sem allir leikir mótsins verða sýndir, gestum og gangandi að kostnaðarlausu. Torginu verður þannig breytt í EM stofu.
Ásamt því að sýna leikina á risaskjá verður boðið uppá fjölskylduskemmtun tengda fótbolta með ýmsum uppákomum alla daga meðan mótið stendur. Samkvæmt tilkynningunni á borgarinnar miðast öll umgjörð, veitingar, dagskrá og básar við að um fjölskylduskemmtun sé að ræða.