Tunglið er fyrirbæri sem flestir ættu að kannast við. Samkvæmt Stjörnufræðivefnum er tunglið, eða máninn eins og hann er stundum kallaður, eini náttúrulegi fylgihnöttur jarðarinnar. Tunglið er bjartasti hnötturinn á næturhimninum og er gjarnan talið stjórna flóði og fjöru á jörðinni. Frægar eru ferðir manngerðra geimfara á tunglið en maðurinn steig fyrstu skref á hnettinum fyrir fimmtíu árum síðan, þann 20. júlí 1969.
Það er því hálf ómögulegt að skilja hvernig Donald Trump, forseti Bandaríkjanna, getur haldið því fram að tunglið sé hluti af Mars. Rauða plánetan Mars er í 33,9 milljón mílna fjarlægð frá jörðinni og þó uppi séu háfleygar hugmyndir um mannaferðir til Mars á næstu áratugum, hefur lítið farið fyrir þeim plönum.
Forsetinn tísti furðulegri yfirlýsingu á Twitter-reikningi sínum í gær, föstudaginn 7. júní. Í tístinu hraunar Trump yfir geimferðarstöð Bandaríkjanna, NASA, eins og honum einum er lagið. Segir forsetinn NASA vera að sólunda peningum í fleiri tunglferðir og að stofnunin ætti að einbeita sér að stærri verkefnum, eins og að ná lendingu á Mars. Þá bætir forsetinn við að tunglið sé hluti af Mars.
For all of the money we are spending, NASA should NOT be talking about going to the Moon – We did that 50 years ago. They should be focused on the much bigger things we are doing, including Mars (of which the Moon is a part), Defense and Science!
— Donald J. Trump (@realDonaldTrump) June 7, 2019
Tístið vakti skiljanlega margar spurningar, sérstaklega í ljósi þess að forsetinn hefur áður tíst NASA til stuðnings. Í desember 2017 skrifaði Trump undir yfirlýsinguna Space Policy Directive 1 en í yfirlýsingunni kemur fram að NASA muni nota þekkingu sína á tunglferðum til þess að þróa frekari geimferðir, m.a. til Mars. Í apríl fór Hvíta húsið svo fram á viðbótar 1,6 billjónir dollara við fjárhagsáætlun sína til þess að flýta fyrirhuguðum tunglferðunum og koma fyrstu geimförunum, þar á meðal fyrstu konunni, á grýttar merkur tunglsins fyrir árið 2024.
Um þetta tísti Trump þann 13. maí sl. og er því nýjasta tíst hans enn óskjilanlegra, fyrir utan takmarkaða þekkingu forsetans á sólkerfi okkar.
Under my Administration, we are restoring @NASA to greatness and we are going back to the Moon, then Mars. I am updating my budget to include an additional $1.6 billion so that we can return to Space in a BIG WAY!
— Donald J. Trump (@realDonaldTrump) May 13, 2019