Tvíhöfði sneri aftur á öldur ljósvakans í dag. Jón Gnarr og Sigurjón Kjartansson verða með þætti sína á laugardögum á Rás 2 og fyrsti þátturinn fór í loftið í dag. Hlustendur tóku eftir því að fréttir fóru í loftið á meðan Jón og Sigurjón voru að tala.
Þetta féll illa í kramið hjá þeim félögum en þeir vilja að RÚV sleppi fréttum á meðan Tvíhöfði er í loftinu. Þetta kemur fram í færslu á Facebook-síðu Tvíhöfða. „Við vorum báðir mjög ánægðir með þáttinn og alla umgjörð nema fréttir,“ segir í færsluni.
Við höfðum ekki fattað að fréttir eru á klukkutíma fresti. Það er alltof mikið og algjör óþarfi þar sem ekkert nýtt kemur fram á milli tíma. Við leggjum til að fréttum verði bara algjörlega sleppt á meðan þátturinn er svo við megum nota tímann til að mæta væntingum hlustenda okkar.
Tvíhöfði segir að ekkert merkilegt gerist á einum klukkutíma og kallar fréttir á klukkutíma fresti arfleifð frá gamalli tíð. „Þessar leiðinlegu fréttir fæla líka frá þá ungu hlustendur sem við erum að reyna að ná til,“ segir í færslunni.
„Ef svo ólíklega vill til að eitthvað gerist merkilegt þá getum við rofið útsendingu. Við treystum því að það verði fundin einhver farsæl lausn á þessu sem allir geta sætt sig við.“