Ted Richards er 58 ára gamall Breti og á sér þann draum heitastan að líta nákvæmlega eins út og páfagaukur.
Ted hefur þegar undirgengist sex klukkustunda aðgerð þar sem að eyru hans voru fjarlægð. Aðspurður segist hann hafa gefið vini sínum sem „kynni að meta þau“ eyrun sem fjarlægð voru af höfði hans.
Auk þess að vera eyrnalaus er Ted með 50 göt víðsvegar um líkamann, 110 tattú og hefur látið skera tunguna í sundur. Hann hefur einnig látið setja lit í augun, horn á höfuðið og er með brennimerkt „peace“ merki á öðru herðablaðinu.
Hann segir þetta vera litlar fórnir til þess að líta út eins og páfagaukarnir sínir þau Ellie, Teaka, Timneh, Jake og Bubi.
Hann segir að eftir að eyrun voru fjarlægð sé hann svo ánægður með útlit sitt að hann geti varla slitið sig frá speglinum.
Svona leit Ted út áður en hann hóf umbreytinguna.
Lýtalæknar í Bretlandi hafa hneykslast á fréttunum og þeirri staðreynd að Ted skuli hafa fundið lækni sem var tilbúinn til þess að fjarlægja eyrun á honum.
Hann heyrir að sjálfsögðu ennþá en ytri partur eyrans er hannaður til að bera hljóð inn í það.
Þeir lýsa jafnframt yfir áhyggjum sínum af því að Ted hyggist ætla í fleiri aðgerðir. Þar á meðal til að láta breyta nefi sínu í eitthvað sem myndi líkjast goggi.