Lögmaðurinn Matthew Petersen er hættur við að gefa kost á sér til að gegna embætti alríkisdómara í Bandaríkjunum. Donald Trump, forseti Bandaríkjanna, tilnefndi Petersen sem nýjan alríkisdómara í umdæmi Columbia en það vakti strax athygli að hann hefur aldrei flutt mál fyrir rétti í starfi sínu sem lögmaður.
Það sem vakti meiri athygli var myndband af vandræðalegum svörum hans við spurningum þingnefndar öldungadeildar Bandaríkjaþings sem fór á flug á dögunum. Horfðu á myndbandið hér fyrir ofan.
Í myndbandinu er hann hreinlega grillaður af John Kennedy, öldungadeildarþingmanni Repúblikana, og gat hann hvorki svarað spurningum um störf dómara né starfshætti dómstóla.
Petersen sagði í yfirlýsingu að tilnefning sín hafi truflandi áhrif á skipun dómara og því dragi hann umsókn sína til baka.