Guðni Th. Jóhannesson hefur gefið kost á sér til forseta Íslands. Framboð Guðna hefur verið verst geymda leyndarmál landsins síðustu daga en hann flutti framboðsræðu sína í Salnum í Kópavogi í dag.
Ég las ræðuna og var satt best að segja mjög hrifinn. Nokkur atriði hrifu mig meira en önnur og þau eru hér fyrir neðan.
1. „Um leið á forseti að standa utan við fylkingar í samfélaginu. Fólkið í landinu á að finna að hann sé ekki í liði með einum á móti öðrum. Forsetinn á að vera í nánum tengslum við alla landsmenn. Oft á hann að hlusta frekar en tala.“
2. „Við eigum öll að stuðla að jafnrétti kynjanna, hjálpa nýjum Íslendingum að standa okkur jafnfætis í samfélaginu, hjálpa öllum sem þurfa á aðstoð að halda, leyfa öðrum að hjálpa sér sjálfir. Við eigum að standa saman, leggja okkar af mörkum til samfélagsins.“
3. „Nái ég kjöri í sumar held ég auðvitað áfram að hjóla með börnin í skóla og leikskóla.“
4. „Við þurfum ekki að monta okkur, við þurfum ekki meting, og við þurfum ekki að telja okkur öðrum betri. Þeir sem búa yfir sjálfstrausti sýna hógværð.“
