Stefán Einar Stefánsson, siðfræðingur og fjölmiðlamaður, segir vandamál tengd innflytjendum þegar hafa valdið miklum vandræðum á fæðingardeild Landsspítalans.
Hann segir ekki boðlegt að kvenfyrirlitning verði normaliseruð í íslensku samfélagi.
Fyrst og fremst þakklátur
Stefán, sem er nýjasti gesturinn í hlaðvarpi Sölva Tryggvasonar, segist þakklátur fyrir þau miklu viðbrögð sem þáttur hans Spursmál hefur fengið síðan hann hóf göngu sína:
„Mitt markmið með því sem ég er að gera er aðeins eitt. Að efla upplýsta umræðu og að áhorfendur og hlustendur fái eitthvað fyrir sinn snúð og átti sig betur á hlutunum.
Þetta eru hlutir sem eru mikilvægir í lýðræðislegu samfélagi. Mér finnst mjög undarlegt að það sé komið fólk til valda núna sem ætlar að vinsa út hvaða fjölmiðlamenn sé rétt að ræða við og hverja ekki.
Það er ekki mikill bragur að því þegar fólk í áhrifastöðum í stjórnmálum mætir ekki í þáttinn hjá mér og svarar hvorki tölvupóstum né símtölum.
Kristrún (Frostadóttir) hefur ekki viljað koma, Þorgerður Katrín hefur heldur ekki svarað skilaboðum og Daði Már Kristófersson.
En svo er þetta fólk í Silfrinu, Sprengisandi og öðrum þáttum ítrekað á meðan það svarar engum skilaboðum frá mér.
Verst er þegar fólk svarar ekki einu sinni. Ég mæti til vinnu alla morgna og 50% af mínum launum fara í ríkiskassann til að borga þessu fólki laun, en þau treysta sér ekki til að svara skilaboðum og mæta á einn stærsta umræðuvettvang landsins.“
Þórður Snær að hefna sín?
Aðspurður segir Stefán Þórð Snæ Júlíusson vera einn þeirra sem stendur á bakvið þetta:
,,Þó að ég segi sjálfur frá hafa Spursmál á ákveðinn hátt orðið að stóra sviðinu í stjórnmálaumræðunni, það sýnir bara hlustunin og áhorfið og sá sem kemur og ræðir við mig nær til mjög margra í gegnum þáttinn.
Ef að þú hefur góðan málstað að verja ættir þú ekki að hafa neitt að fela og ættir að koma bara mjög vel út úr viðtali hjá mér.
En ég hef haft spurnir að því að Þórður Snær Júlíusson, framkvæmdastjóri Þingflokks Samfylkingarinnar sé að leggja mjög mikla áherslu á að stjórnarþingmenn mæti ekki í þáttinn hjá mér.
Ef hann heldur að hann geti einhvern vegin einangrað mig eða þáttinn með þessu, þá er það mikill misskilningur.
Ég hef rætt við þingmenn bæði í Viðreisn og Samfylkingunni sem segja mér að hann leggi hart að þeim að koma ekki.“
Alltof mörg drottningarviðtöl
Stefán ræðir í þættinum um tildrög Spursmála. Hann segist hafa verið orðinn mjög þreyttur á fjölmiðlum þar sem fyrir fram ákveðið handrit liggur fyrir og viðmælandinn getur bara svarað einhverju út í loftið án þess að vera spurður erfiðra spurninga:
,,Þetta hefur oft verið bara einhver algjör froða þar sem viðmælandinn svarar einverri allt annarri spurningu en hann var spurður.
Íslendingar hafa kannski ekki verið vanir aðgangshörku í fjölmiðlum, en þetta er bara mjög eðlileg blaðamennska og viðbrögðin við þættinum sýna að það er eftirspurn eftir þessu.
Mbl er gríðarlega vel og mikið lesinn vefur, en við höfðum kannski ekki verið mikið í að stinga á stóru kýlunum áður en við fórum af stað með Spursmálin.
Við létum vaða í þetta og ég gaf það strax út að það yrði talað tæpitungulaust, þjarmað að fólki og það krafið um svör.“
Ekki kynþáttahatur að segja sannleikann
Í þættinum bera innflytjendamál á góma og Stefán segir fólkið sem helst vilji þagga umræðu um innflytjendamál ekki í neinum tengslum við veruleika þeirra sem búa á svæðum þar sem flóttamenn búa og vandamál hafa komið upp:
,,Vandinn í Breiðholtsskóla er til dæmis orðinn svo alvarlegur að börn sem eru þar í skóla munu líklega sum aldrei bíða þess bætur.
Rótin að þessu er megn kvenfyrirlitning og kynþáttahatur múslimafjölskyldna gegn hvítu fólki.
Það er hópur af fólki sem er knúinn áfram af þessum kenndum og er að valda gríðarlegum vandræðum og menn ráða ekki neitt við neitt.
Við höfum það staðfest að ákveðnir nemendur í Breiðholtsskóla hafa farið með mikilli hörku að kvenkyns kennurum og segjast ekki þurfa að taka mark á þeim af því að þær séu konur og ljóshærðar.
Það er bara einn kynþáttur í heiminum ljóshærður, svo að þetta tiltekna fólk hefur hatur á því fólki sem hefur reynt að bjóða það velkomið hingað,“ segir Stefán og heldur áfram:
,,Vandamálin tengd þessu dúkka upp eitt af öðru. Á kvennadeild Landsspítalans er til að mynda standandi vandamál á fæðingardeildinni vegna gríðarlega ljótrar framkomu gegn starfsfólki og konum með nýfædd börn.
Ákveðnir menn úr múslimaheiminum hafa verið að sýna af sér alvarlega framkomu inni á deildinni bæði gagnvart kvenkyns starfsmönnum og eiginkonum sínum.
En starfsfólkið þorir ekki að tala um þetta opinberlega.
Þetta eru einfaldlega hópar manna sem fyrirlíta konur. Það gengur ekki að menn séu með upsteit og yfirgang í þessum aðstæðum.
Ég tala um þetta af því að heilbrigðisstarfsfólkið sem er í þessarri stöðu vill alls ekki lenda meira í þessum mönnum og þorir því ekki að segja frá þessu.
Við verðum að stoppa þetta áður en þessi veruleiki verður algengari í okkar samfélagi. Það getur ekki verið í boði að við látum fólk koma hingað og vaða yfir okkur á skítugum skónum með þessum hætti,“ segir Stefán og bendir á að það sé ekki lengur hægt að afgreiða fólk bara sem rasista eða nasista ef það leyfir sér að benda á þessa hluti:
„Það gengur ekki að afgreiða bara alla umræðu þannig að þeir sem eru ekki sammála vinsælustu skoðuninni hverju sinni séu afgreiddir sem slæmar manneskjur.
Þetta snýst um framtíð barnanna okkar og samfélagið okkar til framtíðar. Staðan í innflytjendamálum er augljóslega komin í mjög mikið óefni.
Sums staðar á Reykjanesinu hafa orðið til alvöru „ghettó“ og í raun hefur bara verið algjört ófremdarástand í talsverðan tíma.
Þetta eru mikið til ungir menn sem eðli málsins samkvæmt eru ekki endilega á góðum stað í lífinu.
Og eru með gildi sem eru talsvert ólík okkar.
Ég á vini sem búa á Reykjanesinu sem eiga barnungar dætur sem þeir þora ekki að hleypa út á kvöldin og í raun fá þær bara ekki að fara út án eftirlits.
Af ótta við það sem er í gangi í nærumhverfinu.“
Fólk vill ræða þessa hluti
Stefán Einar segist finna það á öllu að fólk vilji að talað sé um þessa hluti eins og þeir eru og raunverulega tekið á því sem þarf að taka á:
„Það að segja frá staðreyndum er ekki útlendingaandúð, heldur einfaldlega lýsing á veruleika fólks sem býr á svæðinu og lifir við þessa stöðu alla daga.
En einhvern vegin virðist krafan oft sú að það eigi ekki og megi ekki að tala um þetta og að maður sé rasisti ef maður vogar sér að gera það.
Ég bara hafna því alfarið. Þeir sem tala með þeim hætti eru ekki í tengslum við veruleikann. Þetta fólk sem er svona miklu betur innrætt en ég hlýtur þá að vera hlynnt því að búa nálægt flóttafólki á meðan það bíður afgreiðslu sinna mála.“
Hægt er að nálgast viðtalið við Stefán og öll viðtöl og podköst Sölva Tryggvasonar inni á solvitryggva.is