Hlédís Maren Guðmundsdóttir, félagsfræðingur og frambjóðandi á lista Miðflokksins í komandi borgarstjórnarkosningum í Reykjavík, gagnrýnir úttekt sem gerð var á kynþátta- og menningarfordómum innan stofnana Reykjavíkurborgar. Hún segir borgaryfirvöld forgangsraða rangt þegar grunnþjónusta borgarinnar sé ekki í lagi.
Í færslu á X bendir Hlédís á að borgarfulltrúum í Reykjavík hafi ekki tekist að koma í verk einföldum og daglegum verkefnum á borð við ljósaperuskipti, snjómokstur eða bjóða upp á næg leikskólapláss. Á sama tíma hafi borgin fjármagnað rannsókn sem unnin var af Semu Erlu Serdaroglu um kynþátta- og menningarfordóma innan borgarkerfisins.
„Guð má vita hvað það hefur kostað,“ skrifar Hlédís og segir rannsóknina vera setta upp með þeim hætti að niðurstöðurnar geti vart orðið annað en rök fyrir frekari rannsóknum, stefnumótun og aukinni fjármögnun til hagsmunasamtaka.
Segir niðurstöður byggja á takmörkuðum gögnum
Hlédís bendir á að samkvæmt niðurstöðum rannsóknarinnar hafi alls 1.417 starfsmenn tekið þátt í könnuninni af um 9.351 starfsmönnum borgarinnar. Þar af voru 321 karl, 1.088 konur og átta kynsegin.
Samkvæmt niðurstöðunum hafi allir þátttakendur einhvern tímann upplifað að hafa orðið móðgaðir í vinnunni. Algengast hafi verið að það tengdist gríni frá samstarfsfólki eða viðskiptavinum, sem þátttakendur tengdu í sumum tilvikum við þjóðernisuppruna, kynþátt, tungumál eða menningu.
Hlédís segir niðurstöðurnar sýna lítið annað en að fólk geti upplifað óþægindi í vinnuumhverfi, en að þær séu engu að síður settar fram sem vísbending um víðtækan vanda sem kalli á frekari aðgerðir.
Fulltrúar minnihlutans lýsa áhyggjum
Í bókun fulltrúa Sjálfstæðisflokksins og Framsóknarflokksins í ráðinu, eftir kynningu á úttektinni, kemur fram að þeir hafi miklar áhyggjur af stöðu málaflokksins.
Í bókuninni segir að niðurstaðan sé áfellisdómur og að ljóst sé að mikillar vinnu sé þörf við að bæta ferla, skilning og framkvæmdir í málaflokknum.
Í kjölfarið var meðal annars rætt um aukna fræðslu og samræmdar upplýsingar innan borgarkerfisins, auk þess að efla samstarf við grasrótarsamtök, þar á meðal Samtök kvenna af erlendum uppruna.
Einnig var samþykkt að taka til umræðu stöðu lögfræðiráðgjafar fyrir innflytjendur, samkvæmt tillögu áheyrnarfulltrúa Samtaka kvenna af erlendum uppruna, sem áður hafði komið fram í fundargerð mannréttindaráðs frá 22. janúar 2026.
Borgarfulltrúar RVK geta ekki tryggt ljósaperuskipti, snjómokstur eða leikskólapláss. Þeir geta hins vegar fjármagnað úttekt Semu Erlu Serdar á kynþátta- og menningarfordómum og birtingarmyndum þeirra innan stofnana Reykjavíkurborgar. Guð má vita hvað það hefur kostað.… pic.twitter.com/RCi6mCsUIc
— Hlédís Maren Guðmundsdóttir (@HledisMaren) March 3, 2026