„Eftir klúðrið með hitalögnina og rafmagnið á Suðurnesjum er nauðsynlegt að fram fari rannsókn á þessum ósköpum. Í áratug hafa jarðvísindamenn varað við því sem nú gerðist og ógnar heilsu og velferð 30 þúsund manns,“ skrifar ritstjórinn Reynir Traustason sem er engan veginn sáttur við „erlenda gróðabraskara sem hafa enga samfélagslega ábyrgð og hafa sýnt það í verki.“ Þar á Reynir við um eigendur HS Orku.
„Þeir sveitarstjórnarmenn sem bera ábyrgð á því að færa svo mikilvægt fyrirtæki úr eigu samfélagsins í hendur braskara mega hafa ævarandi skömm fyrir.“
„Á meðan innviðir fyrirtækisins á Suðurnesjum eru í uppnámi var HS Orka að braska norður á Ströndum við að koma ósnortnu víðerni fyrir kattarnef. Þeir hafa lagt 2000 milljónir króna í það sem margir telja vera hreint skemmdarverk,“ skrifar Reynir og er harðorður í garð þeirra sveitarstjórnarmanna sem einkavæddu HS Orku á sínum tíma.
„Ég ákæri eigendur HS Orku fyrir vanrækslu sem skaðar samfélögin á Reykjanesskaga. Þeir sveitarstjórnarmenn sem bera ábyrgð á því að færa svo mikilvægt fyrirtæki úr eigu samfélagsins í hendur braskara mega hafa ævarandi skömm fyrir.“
Reynir Traustason býr nú við kulda og skömmtun á rafmagni en hann býr í Innri-Njarðvík í Reykjanesbæ. Hann og þúsundir annarra íbúa mega búast við því að vera án heitavatns í nokkra daga ef marka má upplýsingar frá HS Orku. Fjölmargir eru sammála Reyni og hugsa HS Orku þegjandi þörfina.