Sjötta eldgosið er hafið á Reykjanesskaga og hófst klukkan fimm mínútur yfir sex í morgun. Gossprungan er á þeim slóðum þar sem gos hófst síðast – um kílómeter frá Grindavíkurbæ.
Núna um 13:00 var ákveðið að loka Fjölbrautaskóla Suðurnesja og hafa allir nemendur verið sendir heim. Þá hafa nemendur verið látnir vita að ekkert skólastarf fer fram á morgun. Samkvæmt heimildum Nútímans er það vegna mögulegs heitavatnsleysis og til þess að spara rafmagnsnotkun á svæðinu.
Núna klukkan 13:55 er orðið heitavatnslaust í efri byggðum Keflavíkur, Sandgerði og Garði.
Í tilkynningu frá Reykjanesbæ segir að skólastarfi í leik- og grunnskólum bæjarfélagsins hefur verið aflýst á morgun, vegna vatsskorts.
Fréttin verður uppfærð.
Uppfært 06:54: Þessi ljósmynd er tekin frá Keflavíkurhöfn.
Uppfært 06:56: Athafnasvæði Bláa lónsins voru rýmd í nótt og í morgun en í tilkynningu frá fyrirtækinu gekk rýmingin vel. Ákvörðun um að flytja gesti frá svæðinu var tekin í kjölfar jarðskjálfta sem mældust við Sundhnúksgígaröðina í nótt og svo eldgossins sem hófst í framhaldinu.
Uppfært 06:58: Gossprungan er að lengjast með hverri mínútunni. Böðvar Sveinsson náttúruvársérfræðingur hjá Veðurstofunni segir í samtali við Vísi að gosið virðist vera aðeins norðar en aður og að það hafi verið að stækka: „Þetta hefur verið að lengjast í norður.“
Uppfært 07:01: Hér er beint streymi frá Víkurfréttum – myndavélin er staðsett í Reykjanesbæ.
Uppfært 07:02: Veðurstofan segir að sprungan sé heldur norðarlega – í Sundhnúksgígaröðinni: „Þetta gerðist allt mjög hratt,“ sagði Kristín Jónsdóttir, eldfjalla- og jarðskjálftafræðingur hjá Veðurstofunni í samtali við morgunfréttir RÚV. Hún talar um að fyrirvarinn hafi verið um 30 mínútur – staðsetningin sé miklu norðarlegra en fyrra gos.
Uppfært 07:06: „Þetta er á svipuðum stað og síðast og þetta virðist alls ekki minna en síðast en það hefur þó ekki verið staðfest,“ segir Hjördís Guðmundsdóttir hjá Almannavörnum í samtali við Vísi.
Uppfært 07:10: Vísindamenn segja að sprungan sé um þrír kílómetrar að lengd.
Uppfært 07:14: Þessar ljósmyndir voru að berast úr þyrlu Landhelgisgæslunnar
Uppfært 07:16: Veðurstofa Íslands segir að klukkan 05:30 hófst áköf smáskjálftavirkni norðaustan við Sýlingarfell.
„Um 30 mínútum síðar hófst eldgos á sömu slóðum. Fyrstu mínúturnar lengdist sprungan bæði til norðurs og suðurs. Út frá fyrstu fréttum úr eftirlitsflugi Landhelgisgæslunnar er gosið á sömu slóðum og gaus 18. desember. Sprungan er um 3 km löng, liggur frá Sundhnúk í suðri til austurenda Stóra-Skógfells.“
Uppfært 07:18: Rúmlega 100 gestir voru fluttir í skyndi frá hóteli Bláa lónsins í morgun.
Uppfært 07:23: Fréttastofa RÚV verður með aukafréttatíma í sjónvarpi klukkan 9 vegna eldgossins.
Uppfært 07:38: Vísindamenn telja að hraunrennslið nái á Grindavíkurveg í kring um hádegið miðað við flæðið.
Uppfært 07:41: Samkvæmt Ármanni Höskuldssyni mun mögulega reyna á varnargarða við Svartsengi.
Uppfært 07:46: Hægt er að fylgjast með hvaða áhrif eldgosið hefur á loftgæði með því að smella hér.
Uppfært 07:51: Vísindamenn sem flugu yfir gosið í þyrlu Landhelgisgæslunnar segja Grindavík ekki í jafn mikilli hættu og 14. janúar þegar þarna gaus síðast.
Uppfært 07:56: Hitaveituæðin til Reykjanesbæjar gæti verið í hættu samkvæmt HS Veitum. Það mun skýrast eftir því sem líður á daginn.
Uppfært 08:08: Stórvirkar vinnuvélar undirbúa nú jarðveg sem nota á til að loka Grindavíkurvegi.
Uppfært 08:10: Víðir segir ástandið í Grindavík nokkuð gott.
Uppfært 08:40: Hér fyrir neðan er vefmyndavél sem horfir á Svartsengi frá fjallinu Þorbirni.
Uppfært 09:11: Gjóska eða gjall er að falla í Grindavík samkvæmt Veðurstofu Íslands.
Uppfært 10:01: Hraunbreiðan nálgast nú Grindavíkurveg rétt norðan við varnargarðinn sem liggur að Sýlingarfelli. Hér fyrir neðan má sjá samanburð á staðsetningu á hraunjaðrinum eins og hann sést úr vefmyndavél RÚV kl. 9:27 og svo kl. 9:53.
Uppfært 10:21: Hraunbreiðan hefur nú náð Grindavíkurvegi.
Uppfært: 12:01: Mikil hætta á að það verði heitavatnslaust á Suðurnesjum. Vegna þessa hafa HS Veitur birt leiðbeiningar sem ætluð eru íbúum á svæðinu. Hægt er að nálgast leiðbeiningarnar hér.
Uppfært 12:30: Heitavatnslögnin til Reykjanesbæjar hefur rofnað vegna hraunflæðisins.
Uppfært 13:11: Búið er að loka Fjölbrautaskóla Suðurnesja og hafa allir nemendur verið sendir heim. Þá hafa nemendur verið látnir vita að ekkert skólastarf fer fram á morgun. Samkvæmt heimildum Nútímans er það vegna mögulegs heitavatnsleysis og til þess að spara rafmagnsnotkun á svæðinu.
Uppfært 14:40: Í tilkynningu frá Reykjanesbæ segir að skólastarfi í leik- og grunnskólum bæjarfélagsins hefur verið aflýst á morgun, vegna vatsskorts.