Karlmaður sem beraði sig ítrekað fyrir stjúpdætrum sínum, fróaði sér fyrir framan þær og skipaði þeim að horfa hefur verið dæmdur í fimm mánaða fangelsi fyrir kynferðis- og barnaverndarlagabrot. Þetta kemur fram á vef RÚV í dag.
Dómurinn er skilorðsbundinn til tveggja ára. Á vef RÚV kemur fram að maðurinn hafi ítrekað sýnt stjúpdætrum sínum ósiðlegt athæfi og að hann hafi stundað sjálfsfróun í herbergi sínu og inn í stofu íbúðar þeirra að þeim ásjáandi.
Þá er hann dæmdur fyrir að hafa tvisvar opnað baðslopp sinn á meðan kynfæri hans sáust í reisn og snert sig. Hann skipaði annarri stúlkunni að horfa á sig í eitt skipti þegar hann beraði sig á meðan þau voru að horfa á sjónvarpið.
Maðurinn neitaði sök fyrir dómi en kvaðst minnast þess að hafa fengið holdris á meðan hann horfði á sjónvarpið með annarri stúlkunni. Hann neitaði því þó að hafa gripið í hana og neytt hana til að horfa.
Dómurinn taldi hinsvegar framburð systranna trúverðugan. Auk fimm mánaða fangelsis er honum gert að greiða annarri stúlkunni 700 þúsund krónur í miskabætur og allan sakarkostnað.