Gunnar Nelson hyggst að öllum líkindum ekki berjast meira á þessu ári. Þetta kemur fram í viðtali á vef MMA frétta. Gunnar var rotaður af Santiago Ponzinibbio í júlí en eftir bardagann kom í ljós að Santiago hafði ítrekað potað í augu Gunnars sem er að sjálfsögðu ekki leyfilegt.
Gunnar og félagar kærðu úrslit bardagans við Santiago en í viðtali við MMA fréttir segir hann að ekkert sé komið út úr kærunni og að málið sé í höndum UFC-bardagasambandsins. „Það er samt jákvætt að þetta sé búið að taka svona langan tíma,“ segir hann.
Það þýðir að þeir séu að íhuga þetta. Þetta er stórt atriði, ef maður spáir í því. Þeir senda hrikalega sterk skilaboð út með ákvörðun sem þeir taka í þessu atriði. Ég er smá spenntur að sjá hvað gerist.
Gunnar býst við að berjast á ný í febrúar eða mars á næsta ári. „Ég mun að öllum líkindum taka mér keppnisfrí það sem eftir er af árinu og hvíla höfuðið almennilega. Ég held að það sé smart move fyrir framhaldið.“