Karlmaður var dæmdur í tveggja mánaða skilorðsbundið fangelsi í Héraðsdómi Reykjaness í síðustu viku fyrir að fylgjast með ólögráða stjúpdóttur sinni á baðherberginu. Þá er hann dæmdur til að greiða stúlkunni 250 þúsund krónur í bætur. Karlmaðurinn gægðist í gegnum skráargat á baðherbergishurð á heimili þeirra. Móðir stúlkunnar hafði áður varað hana við hneigðum mannsins og því hengdi hún föt fyrir skráargatið. Maðurinn notaði grillpinna til þess að ýta fötunum til hliðar. Þetta kemur fram á vef RÚV.
Móður stúlkunnar hafði varað hana við vegna skilaboða sem maðurinn hafði áður sent á stúlkur sem höfðu passað fyrir þau. Í tölvu mannsins sást að hann hafði ítrekað leitað að klámi sem tengdist kynlífi milli stjúpföður og stjúpdóttur.
Maðurinn var ákærður fyrir að hafa í tvígang fylgst með stelpunni í sturtu. Fyrst í desember árið 2015 og svo aftur ári síðar. Fyrir fyrra atvikið var maðurinn sýknaður.
Þegar fyrra atvikið átti sér stað ræddi stúlkan við móður sína eftir að baðherbergislykillinn datt á gólfið þegar hún var í sturtu. Móðir hennar ráðlagði henni að gæta sín á stjúpföðurnum. Þær hafi ákveðið að fyrirgefa honum eftir að hann bað móðurina afsökun á hegðun sinni.
Í seinna skiptið tróð stúlkan bréfþurrku í skráargatið og hengdi gallabuxur á hurðarhúninn ásamt því að leggja handklæði á gólfið. Þegar hún var að tannbursta sig sá hún grillpinna sem var stungið í gegnum gatið til þess að færa buxurnar til hliðar svo sæist inn.
Hún fór með móður sinni á lögreglustöðina síðar sama dag og þær lögðu fram kæru. Maðurinn var handtekinn daginn eftir og viðurkenndi brot sín. Hann sagðist ekki hafa gert þetta áður og sagðist ekki hafa kynferðislegar langanir til stjúpdóttur sinnar.
Fyrir dómi sagði maðurinn að hann hafi ekki kíkt inn um skráargatið í kynferðislegum tilgangi. Stúlkan hafi verið klædd og að tannbursta sig þegar hann kíkti inn um gatið og því sé þetta ekki kynferðisbrot.
Í dómnum segir hins vegar að hann hafi vitað að stjúpdóttir hans væri á leið í sturtu og hafi því getað búist við því að hún væri fáklædd eða nakin. Auk þess sem klámleit hans gefi til kynna kynferðislega langanir.