Arndís Anna Kristínardóttir Gunnarsdóttir þingmaður Pírata hefur sent frá sér yfirlýsingu til fjölmiðla vegna máls sem kom upp á skemmtistaðnum KíKí aðfaranótt laugardags og Nútíminn greindi frá í dag. Þar kemur fram að hún hafi beðið hlutaðeigandi afsökunar á framkomu sinni og tekur það fram að það séu forréttindi að vera kjörinn fulltrúi – því fylgi ábyrgð og henni þyki það leitt að hafa brugðist svona við.
Yfirlýsingin í heild sinni:
„Þetta mál er mér ekki til sóma og mér þykir það mjög leiðinlegt. Ég var búin að drekka of mikið og brást illa við þegar dyraverðir opnuðu hurðina á klósettinu, ég var dónaleg og streittist á móti. Óháð öllu öðru, var hegðun mín ekki til fyrirmyndar. Ég hef beðið hlutaðeigandi afsökunar á framkomu minni. Það eru forréttindi að vera kjörinn fulltrúi, því fylgir ábyrgð og mér þykir leitt að hafa brugðist svona við.“