Nútíminn heldur áfram að bjóða lesendum upp á frábærar uppskriftir og við erum í jólaskapi þessa dagana. Þessir hátíðlegu marengstoppar eru frábærir einir og sér með kaffibollanum en einnig er sniðugt að skreyta kökuna fyrir jólaboðið með þeim. Stjörnurnar og skrautið ætti að fást í verslunum eins og Hagkaup, Söstrene Grene eða sérhæfðum kökuskreytingarverslunum.
Hráefni:
- 4 eggjahvítur við stofuhita
- 2 dl sykur
- hnífsoddur af cream of tartar eða vínsteinslyftidufti
- 1/8 tsk möndludropar
- grænn matarlitur
- litlar kúlur og stjörnur til skrauts
- Flórsykur til skrauts
Aðferð:
- Hitið ofninn í 100 gráður.
- Setjið eggjahvítur, sykur og cream of tartar/vínsteinslyftiduft í hrærivélaskál.
- Hitið vatn í potti og leggið skálina yfir vatnið. Handþeytið vel þar til sykurinn hefur alveg bráðnað. Hrærið þá möndludropana saman við.
- Þeytið þetta síðan í hrærivélinni á miðlungshraða þar til eggjahvíturnar eru aðeins farnar að stífna. Þá fer matarliturinn saman við. Stillið síðan á háan hraða og þeytið áfram þar til blandan er vel stíf.
- Setjið blönduna í sprautupoka, setjið bökunarpappír á ofnplötu og gerið lítil jólatré á plötuna. Dreifið litlu kúlunum yfir( stjörnurnar fara eftir á)
- Bakið í 2 klst. Eftir 2 klst er gott að slökkva á ofninum, opna aðeins hurðina á honum og leyfa þessu að standa áfram í ofninum í aðrar 2 klst.
- Hrærið síðan saman c.a. 1 msk af flórsykri og 1 tsk af vatni og notið blönduna til þess að “líma” stjörnurnar á toppinn á jólatrjánum.
- Þegar allt er klárt er fallegt að setja örlítið af flórsykri í lítið sigti og dreifa smá jólasnjó yfir trén.