Mikið er fjallað um fjármál Britney Spears þessa dagana eftir að söngkonan óskaði eftir því að faðir hennar hætti sem fjármálastjóri. Það var ekki samþykkt og hélt hann völdum í bili sem leiddi til þess að slagorðið #FreeBritney varð eitt það vinsælasta á netinu.
Aðdáendur Britney hafa notað #FreeBritney herferðina til þess að söngkonan fái aftur stjórn yfir sínum ferli, fjármálum og einkalífi. Hin 38 ára gamla Britney missti að hluta sjálfræði sitt eftir að hún var lögð inn á geðsjúkrahús 2008.
Síðan þá hefur faðir hennar tekið flestar mikilvægar ákvarðanir fyrir hönd Britney og eru ekki allir sammála því fyrirkomulagi. Samsæriskenningar segja að faðir Britney sé þekktur ofbeldismaður sem ráðist á dætur sínar og barnabörn reglulega. Þetta eru óstaðfestar sögusagnir en þó virðist sem samband föður Britney við drengina hennar hafi stundum verið stormasamt.
Aðrir segja að móðir Britney sé vandamálið en hún sækist eftir því að stjórna – sérstaklega eftir að faðir Britney veiktist á síðasta ári. Að mati dómstóla hefur faðir Britney staðið sig vel og hefur auður hennar vaxið mikið frá því hann tók við sem fjármálastjóri.
Nýjustu fréttir herma svo að yngri systir Britney hafi leynilega fengið yfirráð yfir öllum eignum Britney ef hún myndi láta lífið. Það er þá hlutverk Jamie Lynn Spears að ráðstafa eignunum þannig þær skili sem mestu til barna Britney.
Þær systur eru mjög nánar og þykir flestum jákvætt að heyra að systirin Jamie sé kominn í málið.