Eiður Smári Guðjohnsen er einn besti fótboltamaður sem þjóðin hefur átt. Það er óumdeilt. Ferill hans er glæsilegur en hann hefur unnið magnaða sigra með mörgum stórkostlegum liðum.
En af hverju eru stjórnmálamenn alltaf að líkja sér við hann? Á skömmum tíma hefur honum verið líkt við Davíð Oddsson og Sigmund Davíð Gunnlaugsson. Davíð líkti sér reyndar sjálfur við hann en Guðni Ágústsson á hina líkinguna.
Nútíminn tók saman tvær langsóttar líkingar.
Sigmundur Davíð eins og Eiður Smári
„Sigmundur Davíð er afreksmaður í pólitík. Með skuldalækkun, Icesave og að endurheimta fé fallinna banka hefur hann sýnt það. En nú eiga Framsóknarmenn ekki að deila um þessa menn. Þeir verða að meta þetta eins og í fótbolta. Á Eiður Smári að vera sá sem keyrir liðið áfram og skorar mörkin eða er annar líklegur til þess að gera það betur í þetta sinn.“
Þetta sagði Guðni Ágústsson í viðtali í Fréttablaðinu.
Davíð Oddsson eins og Eiður Smári
„Ef þú ert í erfiðum leik þá viltu hafa Eið inn á. Hann er kannski ekki sá sprækasti, hann hleypur ekki allan tímann en ef það er kominn ofboðslega mikill taugatitringur í liðið og boltinn birtist í teignum, þá er einn algjörlega kúl sem sennilega mun negla boltanum inn.“
Þetta sagði Davíð Oddsson í viðtali á Brennslunni á FM957.