today-is-a-good-day

Þegar ballið er búið án þess að hafa byrjað

Vinkona mín sem skildi fyrir nokkrum mánuðum var að segja mér frá manni sem hún hafði kynnst í gegnum vinnuna. Henni var mikið niðri fyrir þegar hún sagði mér frá því hvernig hann hefði fengið fullnægingu á núll einni, án þess svo mikið sem pæla í því hvort vinkona mín væri að fá eitthvað út úr þessu.

Ég spurði hana hvort hún vildi nú ekki gefa honum annan séns, hann hefði kannski bara verið stressaður. Svo mundi ég allt í einu eftir gaur sem ég hitti fyrir nokkrum árum og var fljót að segja vinkonu minni að gleyma þessu bara. Stundum væru hlutirnir bara fullreyndir.

Ég sá hann á Tinder og renndi með fingrinum til hægri yfir skjáinn. Það hafði hann greinilega gert líka svo þetta var „match“. Hann var ósköp sætur, dálítið yngri en ég og bjó ekki á höfuðborgarsvæðinu. Við vorum búin að spjalla í nokkra daga á Tinder þegar hann sagði mér að hann væri að koma í bæinn og við vorum sammála um að við yrðum að nýta bæjarferðina hans til að hittast.

Spjallið lofaði góðu og miðað við hvernig hann talaði um allt það sem hann ætlaði að gera við mig og með mér í bólinu átti ég ekki von á öðru en þetta yrði stórkostleg upplifun. En það er þetta með væntingarnar. Séu þær of miklar, eru allar líkur á að maður verði fyrir vonbrigðum.

Gat ekki haldið aftur af sér

Hann mætti heim til mín og kvöldið byrjaði vel. Við sátum á sófanum og spjölluðum um heima og geima. Svo fór að færast fjör í leikinn. Maðurinn kunni að kyssa, hann mátti svo sannarlega eiga það, en það kann ég nú svo sem líka. Hann var orðinn móður og másandi og allt í einu fann ég hvernig hann kipptist allur til. Þar með var ballið búið. Hann tók þetta ekkert nærri sér og sagði bara: „Þetta gerist stundum þegar ég er ekki búinn að fá það lengi.“

Hann vildi endilega hitta mig aftur áður en hann færi heim til sín nokkrum dögum síðar og eftir dálitla umhugsun ákvað ég að slá til. Kannski var þetta bara einangrað tilfelli og eins og hann sagði, þá gerðist þetta þegar hann væri ekki búinn að fá það lengi. Og þarna yrðu ekki nema tveir dagar frá því hann fékk það síðast, þótt það hefði reyndar bara verið í buxurnar, svo hann hlaut að geta haldið aftur af sér næst.

„Hann var orðinn móður og másandi og allt í einu fann ég hvernig hann kipptist allur til. Þar með var ballið búið.“

Allt er þá er þrennt er? Æi nei

Til að gera langa sögu stutta endurtók sagan sig. Hann hristist allur og skalf í miðju kossaflensi og lét sig svo falla aftur í sófann. „Fokk! Ég held það sé bara svo ógeðslega gott að kyssa þig,“ sagði hann kinnroðalaust. Fyrr mátti nú vera! Hann fór svo fljótlega að tygja sig en spurði áður en hann fór hvort við ættum að hittast aftur næsta kvöld. Það væri síðasti séns áður en hann færi aftur heim.

Ég hugsaði með mér að allt væri þá er þrennt er en ég nennti ómögulega að standa í þessu einu sinni enn. Ég velti því líka fyrir mér hvort aumingjans maðurinn hefði örugglega pakkað nógu mörgum hreinum buxum fyrir ferðalagið, vonandi hefði hann þá að minnsta kosti aðgang að þvottavél. Ég afþakkaði boðið og sagðist vera upptekin.

Hann sendi mér nokkrum sinnum skilaboð og næst þegar hann átti leið til Reykjavíkur stakk hann upp á hittingi en ég var „upptekin“. Það var eins og hann væri ekkert að átta sig á því að mér þætti ekki eðlilegt að hann væri alltaf að hafa sáðlát í buxurnar …

Ekki óalgengt vandamál

Ég veit að það er ekki óalgengt vandamál að karlar fái það of fljótt. Við vinkonurnar höfum nokkrum sinnum rætt þetta þótt engin önnur en ég hafi þá sögu að segja að viðkomandi hafi fengið það fullklæddur, í buxurnar. Sérfræðingar segja vandamálið oftast stafa af sálrænum toga. Lítið sjálfstraust, spenna, eða vilji til að standa sig vel í kynlífinu getur spilað þar inn í. Það hjálpar heldur ekki að hugsa of mikið um þetta því það getur ýtt undir stress og að fá það of fljótt.

Ég get kannski ekki sett mig í þessi spor, þar sem við konur þurfum varla að hafa áhyggjur af því að fá það of fljótt …. Kannski er það hægara sagt en gert en fyrir þá sem fá það í buxurnar, eða svo gott sem, er líklega best að velta sér ekki of mikið upp úr þessu, reyna að slaka á og njóta kynlífsins. Það er nefnilega maraþon, ekki spretthlaup.

Fleiri sambærilegar greinar úr Vikunni eru aðgengilegar á vef Birtings.

Auglýsing

læk

Instagram