Pétur Kristján Guðmundsson, kvikmyndagerðarmaður, lamaðist í slysi í Austurríki fyrir um tíu árum síðan.
Eftir að læknar sögðu honum að hann yrði bundinn við hjólastól það sem eftir væri, neitaði hann að trúa því og var staðráðinn í að ganga aftur. Hann áttaði sig þó síðar hægt og rólega á því að hann myndi ekki sigrast á þessu.
„Þetta er svo suddalegt, þegar þú slítur í sundur á þér miðtaugakerfið að margir fara bara í afneitun. Þeir taka ekki til greina að þeir muni aldrei ganga aftur. Ég var einn af þeim,“ segir Pétur.
Hann sökk í djúpt þunglyndi sem hann átti um tíma erfitt með að sjá fyrir endann á. Þegar botninum var náð fór hann að lesa sér til um svokölluð ofskynjunarlyf á borð við sílósíbín, DMT og ayawaska. Pétur fór að prófa sig áfram með þessi lyf og þá fór af stað ferli sem leiddi á endanum til þess að hann fór að sjá líf sitt í nýju ljósi.
Frosti Logason heimsótti í Pétur í Ísland í dag á Stöð2 í gærkvöldi.