Jóhannes Loftsson, formaður Ábyrgrar framtíðar, er nýjasti gestur Spjallsins með Frosta Logasyni. Hann er einn þeirra sem hélt á loft beittri gagnrýni á heilbrigðis- og sóttvarnaryfirvöld í faraldrinum mikla. Hann segist hafa upplifað mikla hræðslu fólks við að tjá sig enda hafi hann sjálfur fengið mikið bágt fyrir að benda á það sem hann taldi rangt og illa gert í viðbrögðum við vírusnum. Hann fullyrðir að skaði vegna bóluefnanna sé miklu meiri heldur en almennt er viðurkennt og telur nauðsynlegt að óháðir aðilar fái að gera úttekt á aðgerðunum.
„Menn eru kannski ekki tilbúnir fyrir svona frjálsa umræðu oft. Til dæmis þegar ég byrjaði að skrifa hart, þegar ég komst að því að það væri 0.2% dánartíðni um miðjan mars þegar mælingar deCODE sýndu það, þá var ég með nokkra fylgjendur á Facebook og skrifaði þá grein sem ég kallaði „Mistök aldarinnar“ þá hvarf helmingur þeirra. Hræðslan var orðin svo mikil við þetta. En þegar ég fór að stíga fram og tala um þetta þá voru margir sem þorðu ekki að tjá sig en þeir höfðu samband við mig og ég kom hugmyndum þeirra á framfæri. Þetta var mjög eitrað andrúmsloft sem átti sér stað þarna,“ segir Jóhannes sem man augnablikið sem kveikti neistann hjá honum og hvatti hann áfram til þess að fræðast meira um málið og reyna að koma þeim upplýsingum á framfæri.
„Ég man eitt sem kveikti í mér til að byrja með árið 2020 en þá var ég að lesa upplýsingar um það að þetta væri tilbúinn vírus. Það var í byrjun árs 2020. Þá voru menn að sjá eitthvað í prógramminu á þessum vírus. Förum yfir atburðarrásina þar. Michael Shellenberger blaðamaður kom nýlega með uppljóstrun og komst að því og sýndi fram á að þrír fyrstu sjúklingarnir unnu á þessari Wuhan-tilraunastofu – einn þeirra var að vinna við að þróa kórónuvírusa og var að vinna við „móður“ kórónuvírusana,“ segir Jóhannes og bætir við að uppgjör við COVID sé gríðarlega mikilvægt.
20% þeirra sem fengu bóluefni glíma við eftirköst
„Uppgjör við COVID er gríðarlega mikilvægt. Þetta er hræðilegt. Það eru margir sem hafa hlotið skaða af bóluefninu og ég þekki marga. Mín tilfinning er sú að kannski 20% af fólki hafi orðið fyrir einhverju sem það verður með alla ævi. Það var gerð mæling í Bandaríkjunum þar sem það voru 17% – allt milli himins og jarðar þar inn í. Umfangið er gríðarlegt. Margir vilja meina að það séu umfram dauðsföll núna og að það sé COVID-bóluefnunum að kenna“
Frosti bendir á að fólk sé hrætt við umrætt uppgjör. Hrætt við að það komi ljós ansi mörg mistök og því sé ekki vilji til staðar til þess að fara í heiðarlega rannsókn hvað sé nákvæmlega rétt og rangt í þessu.
„Í rauninni var þetta ástæðan fyrir því að stjórnmálaflokkurinn Ábyrg framtíð fór af stað. Fyrst ætluðum við að vekja athygli á þessu – það var ekki hægt að komast í gegnum fjölmiðla með þetta – og ef eitthvað gerist að það sé þá einhver óháður aðili sem greinir hvort eitthvað gerist. Ekki að gerandinn sjálfur sé að rannsaka það, það er ákveðið prinsipp atriði,“ segir Jóhannes í þessu mikilvæga viðtali hjá Frosta.
Hægt er að hlusta og heyra viðtalið í heild sinni á hlaðvarpsveitunni Brotkast en við birtum hér stutt myndskeið sem hægt er að horfa á hér fyrir neðan.