Reuters fréttastofan greinir frá því að þýski samgönguráðherrann Volker Wissing hafi fengið mikla mótspyrnu við tillögu sinni um að banna akstur einkabíla um helgar í sumar.
Þýska þjóðin hefur tekið mjög illa í tillöguna en ráðherrann segir hana nauðsynlega til að Þjóðverjar nái markmiðum sínum í loftslagsmálum, en þrátt fyrir að losun gróðurhúsalofttegunda 2023 hafi verið sú minnsta sem þýska hagkerfið, sem er það stærsta í Evrópu, hefur séð í rúm 70 ár, þá telja stjórnvöld bílaflota sinn eiga langt í land með að ná markmiðum ríkisstjórnarinnar í loftslagsmálum.
Frumvarpið hefur verið til umræðu í ríkisstjórninni mánuðum saman en ríkisstjórnarflokkarnir þrír deila hart um efnistök frumvarpsins og virðist ekkert samkomulag sjáanlegt í náinni framtíð. Andstæðingar frumvarpsins segja að ekki sé vilji hjá þýsku þjóðinni að settar séu á frekari takmarkanir í nafni umhverfismála.
Ráðherrann sagði að ríkisstjórnin hafi hingað til forðast svo viðamiklar aðgerðir þar sem það muni hafa mikil áhrif á daglegt líf fólksins í landinu en að ráðuneytið myndi neyðast til að setja slíkt bann í gildi ef ekki verður komið samkomulag um frumvarp hans fyrir miðjan júlí á þessu ári.
Hann segir einnig að slíkt bann um akstur einkabíla á laugardögum og sunnudögum myndi gilda um allt Þýskaland og um óákveðinn tíma.
Þýski fjármálaráðherrann, Christian Lindner, segist styðja við bakið á samgönguráðherra og segir lög sem fyrri ríkisstjórn setti á til að vernda umhverfið gæti fljótlega leitt til að slíkt ökubann yrði að veruleika.