„Það er dálítið merkilegt að athuga það að það er stutt síðan Grindavík fer raunverulega að vaxa. 1950 eru þarna ekki nema 500 íbúar og síðan er þetta komið upp í 4000. Mest af því byggist eftir að Vestmannaeyjagosið og þegar reynslan af því er komin í ljós – þetta eru skipulagsyfirvöldin sem áttu að kortleggja sprungurnar og Skipulagsstofnun hefði átt að fylgja því eftir að samþykkja ekki skipulagið nema að það væri búið að gera þessar nauðsynlegu frumrannsóknir á náttúrufarsaðstæðum á þessu bæjarstæði,“ segir Trausti Valsson, skipulagsfræðingur, sem er nýjasti gestur Spjallsins með Frosta Logasyni á hlaðvarpsveitunni Brotkast.
Trausti hefur á löngum ferli margsinnis varað við því að uppbygging bæjarfélaga hafi ekki tekið mið af náttúruvá sem vel sé hægt að kortleggja. Bendir hann meðal annars á að Grindavíkurbær hafi að stórum hluta verið byggður upp eftir Vestmannaeyjagos þegar menn voru farnir að gera sér grein fyrir hættunni sem fylgdi því að reisa byggðir í grend við þekkt eldstöðvakerfi. Trausti telur að austan Grindavíkur séu nokkuð örugg svæði sem vel hefði verið hægt að skipuleggja uppbyggingu á ef hlustað hefði verið á þá fræðimenn sem lögðu mikla vinnu í að kortleggja þessar hættur á sínum tíma.
„Þú ert að segja að áður en mest öll þessi byggð byggðist í Grindavík að þá var komin alveg nægilega mikil þekking til þess að menn hefðu áttu að vita og höfðu getað skipulagt Grindavíkurbæ með öðrum hætti?“ segir Frosti.
„Já. Meira að segja, ég birti það í einni bók minni aðalskipulagskortið og sprungurnar eru þar sýndar og hverfa undir byggðina. Í fyrsta lagi er að húsin og lagnir liggi ekki þvert á sprungur og svo er þarna á milli þessara tveggja sprungna myndast sigdalur og þá hefði í skipulaginu þurft að gera grænt svæði. Svo hugsa ég að í austurhluta Grindavíkur séu mjög örugg svæði hvað varðar sprungur en núna eftirá er verið að byrgja brunninn eftir að barnið er dottið ofan í hann.“
Ef þú vilt hlusta á allt viðtalið þá getur þú skundað inn á hlaðvarpsveituna Brotkast en við birtum stutt myndskeið úr því hér fyrir neðan.